पथलैया (बारा), ८ वैशाख । वीरगंजको मुख्य सडक विस्तार अभियान सुरु भएसँगै सडक डिभिजन कार्यालय हेटौंडाले बाराको पथलैया–चुरियामाई सडकखण्डमा पनि सडक फराकिलो बनाउने प्रक्रिया अघि बढाएको छ । यसअन्तर्गत महेन्द्र राजमार्गको पथलैयादेखि चुरियामाईसम्म पर्ने क्षेत्रमा सडकको दायाँ–बायाँ २५/२५ मिटरभित्रका संरचना हटाउन कार्यालयले सूचना जारी गरेको छ ।
यसअघि पनि पटक–पटक सूचना जारी गरिए पनि अतिक्रमण हटाउने काम प्रभावकारी रूपमा कार्यान्वयन हुन नसकेको भन्दै कार्यालयले वैशाख १० गतेसम्मको अन्तिम समयसीमा तोकेको हो । तोकिएको समयभित्र सडक क्षेत्र खाली नगरे वीरगन्जमा झैँ डोजर प्रयोग गरी संरचना हटाइने स्पष्ट संकेत गरिएको छ ।
कार्यालय प्रमुख गुरुप्रसाद अधिकारीद्वारा जारी सूचनामा अनधिकृत रूपमा निर्माण गरिएका संरचना हटाउन आग्रह गर्दै अटेर गरे सार्वजनिक सडक ऐन, २०३१ तथा प्रचलित कानुनअनुसार कडा कारबाही गरिने चेतावनी दिइएको छ ।
यस निर्णयसँगै अमलेखगञ्ज, तीन नम्बर पुल हुँदै चुरियामाईसम्मको क्षेत्रमा सडकको दायाँ–बायाँको २५/२५ मिटर भूभाग खाली हुने देखिएको छ । उक्त क्षेत्र खाली भएपछि पथलैया–हेटौंडा सडकखण्डको स्तरोन्नति तथा विस्तार कार्य अघि बढ्ने अपेक्षा गरिएको छ ।
प्रतिक्रिया दिनुहोस् !