वीरगंज (पर्सा), ४ चैत । पर्सा जिल्लाका तीन स्थानीय तहमा प्रमुख प्रशासकीय अधिकृतको जिम्मेवारी फेरबदल गरिएको छ । संघीय मामिला तथा सामान्य प्रशासन मन्त्रालयको निर्णयअनुसार पोखरिया नगरपालिका, बहुदरमाई नगरपालिका र कालिकामाई गाउँपालिकामा नयाँ प्रमुख प्रशासकीय अधिकृत खटाइएको हो ।
पोखरिया नगरपालिकामा उपसचिव शेखर पौड्याललाई प्रमुख प्रशासकीय अधिकृतको रूपमा पठाइएको छ । यसअघि गृह मन्त्रालयमा कार्यरत रहेका उनलाई नयाँ जिम्मेवारी दिइएको हो । यहाँ निमित्त प्रमुख प्रशासकीय अधिकृतको रूपमा कार्यरत कौशल झाको स्थानमा पौड्यालले जिम्मेवारी सम्हाल्नेछन् ।
त्यसैगरी बहुदरमाई नगरपालिकामा उपसचिव रमेश अधिकारीलाई सरुवा गरिएको छ । उद्योग, वाणिज्य तथा आपूर्ति मन्त्रालयमा कार्यरत अधिकारीलाई नयाँ जिम्मेवारीसहित बहुदरमाई पठाइएको हो । यसअघि उक्त नगरपालिकामा प्रमुख प्रशासकीय अधिकृतका रूपमा वृजकिशोर प्रसाद कार्यरत थिए ।
यस्तै, कालिकामाई गाउँपालिकामा केशव कुमार अधिकारीलाई प्रमुख प्रशासकीय अधिकृतको जिम्मेवारी दिइएको छ । यहाँ कार्यरत राज कुशवाहालाई गृह मन्त्रालय अन्तर्गत सरुवा गरिएको छ भने अतिरिक्त समूहमा रहेका अधिकारीलाई कालिकामाईमा खटाइएको मन्त्रालयले जनाएको छ ।
मन्त्रालयले गत चैत ३० गते गरेको निर्णयअनुसार २१ जना उपसचिव र ६ जना शाखा अधिकृतको एकैपटक सरुवा गरिएको थियो । सोही निर्णयको कार्यान्वयनस्वरूप पर्साका तीन स्थानीय तहमा नयाँ प्रमुख प्रशासकीय अधिकृत खटाइएको संघीय मामिला तथा सामान्य प्रशासन मन्त्रालयले जानकारी दिएको छ ।
प्रतिक्रिया दिनुहोस् !