वीरगंज (पर्सा), ३० चैत । वीरगंजमा नेपाल प्रहरीका जवान विकास चौरसियाको हत्या प्रकरणमा एक महिलासहित चार जनालाई प्रहरीले नियन्त्रणमा लिएको छ । जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतका अनुसार पक्राउ पर्नेहरूमा रौतहटको माधवनारायण नगरपालिका–१ निवासी २६ वर्षीय सन्तोष साह, उनकी २४ वर्षीया पत्नी सोनी कुमारी, बारा जिल्लाको महागढीमाई नगरपालिका–७ निवासी १९ वर्षीय विशाल साह तथा भारतको उत्तरप्रदेश अलीगढ निवासी २१ वर्षीय ओमवीर प्रजापति रहेका छन् ।
प्रहरीका अनुसार सन्तोष र सोनी श्रीमान् श्रीमती हुन् भने विशाल सन्तोषका नातामा पर्ने भाइ र ओमवीर उनका साथी हुन् । पर्साको कालिकामाई गाउँपालिका–१ मुडली घर भई सप्तरीमा कार्यरत प्रहरी जवान चौरसिया विदामा घर आएका थिए । आइतबार साँझ वीरगंज महानगरपालिका–९ श्रीपुर (रानीघाट क्षेत्र) स्थित भारतीय कूटनीतिक नियोग पछाडिको एक घरमा उनलाई कुटपिट गरी हत्या गरिएको हो ।
अनुसन्धानका क्रममा चौरसिया र सन्तोषकी पत्नी सोनीबीच विवाहेतर सम्बन्ध रहेको खुलेको छ । उक्त सम्बन्धबारे थाहा पाएपछि सन्तोषले हत्या योजना बनाएको प्रहरी उपरीक्षक सुदीपराज पाठकले जानकारी दिए । सोही योजना अनुसार सन्तोषले आफ्ना साथीहरू विशाल र ओमवीरलाई कोठामा बोलाएका थिए । त्यसपछि सन्तोषले पत्नी सोनीमार्फत चौरसियालाई फोन गरेर कोठामा बोलाएका थिए ।
सोनीको बोलावटपछि कोठामा पुगेका चौरसियामाथि चारैजनाले मिलेर रड प्रहारसहित कुटपिट गरेका थिए । गम्भीर घाइते भएका उनको घटनास्थलमै मृत्यु भएको प्रहरीले जनाएको छ । घटनाको जानकारी पाएलगत्तै पुगेको प्रहरी टोलीले चारै जनालाई नियन्त्रणमा लिएको थियो । मृतक चौरसिया उक्त स्थानमा किन पुगेका थिए भन्ने विषयमा समेत थप अनुसन्धान भइरहेको प्रहरीले जनाएको छ ।
प्रतिक्रिया दिनुहोस् !