वीरगंज (पर्सा), ३० चैत । पर्साको जिराभवानी गाउँपालिका–४ का वडाध्यक्ष राजेश्वर दास थारुले आफ्नी भाउजु सुगान्धी देवीमाथि कुटपिट तथा दुर्व्यवहार गरेको आरोप पूर्ण रूपमा अस्वीकार गरेका छन् । सुपौलीमा आयोजित पत्रकार सम्मेलनमार्फत उनले आफूलाई लक्षित गर्दै केही सञ्चारमाध्यम र सामाजिक सञ्जालमा आएका समाचारप्रति असन्तुष्टि जनाएका हुन् ।
थारुले यस्ता समाचारले आफ्नो प्रतिष्ठामा गम्भीर असर परेको दाबी गर्दै तथ्य पुष्टि नगरी समाचार सम्प्रेषण नगर्न पत्रकारहरूलाई आग्रह गरे । उनले भने, ‘घटना घट्दा म खेतमा सिँचाइको काममा व्यस्त थिएँ, त्यसमा मेरो कुनै संलग्नता छैन ।’ उनका अनुसार शनिबार दिउँसो भाउजु सुगान्धी देवी र उनका जेठा छोरा कृष्ण दास थारुबीच खेतको बाली बुझ्ने विषयमा विवाद उत्पन्न भएको थियो । सो विवादमा आफू कुनैपनि रूपमा संलग्न नरहेको उनले स्पष्ट पारे ।
कार्यक्रममा वडा सचिव महेश राउत कुर्मीले करिब डेढ बिघा जमिनको बालीसम्बन्धी विवाद लामो समयदेखि चलिरहेको जानकारी दिए । उनले बताएअनुसार गत कार्तिकमा धानबालीको विषयमा विवाद हुँदा प्रहरी चौकी सुपौलीमा भएको सहमतिअनुसार सुगान्धी देवीले धानबाली बुझ्ने र उनका छोरा कृष्ण तथा उमेश दास थारुले गहुँबाली लिने सहमति भएको थियो ।
तर हाल गहुँबाली काट्ने क्रममा सुगान्धी देवीले सो बालीमा पनि आफ्नो दाबी प्रस्तुत गरेपछि विवाद पुनः चर्किएको कुर्मीले जनाए । विवादपछि बाली यथास्थितिमै राखिएको छ भने जग्गा अंशसम्बन्धी मुद्दा विगत चार वर्षदेखि अदालतमा विचाराधीन रहेको छ ।
स्थानीय लक्ष्मी दास थारुका दुई छोरा ब्रह्मन्द दास थारु (जेठो) र राजेश्वर दास थारु (कान्छो) बीच अंशबन्डा भई छुट्टै बसोबास गर्दै आएका छन् । ब्रह्मन्द दास थारुको पहिलो श्रीमतीबाट कृष्ण र उमेश दुई छोरा छन् भने कान्छी श्रीमती सुगान्धी देवीबाट तीन छोरी र एक छोरा रहेका छन् ।
परिवारभित्रको यही अंशबन्डा र बालीसम्बन्धी पुरानो विवादका कारण पछिल्लो घटना उत्पन्न भएको स्थानीयहरू बताउँछन् । 
प्रतिक्रिया दिनुहोस् !