वीरगंज (पर्सा), २९ चैत । पर्साको जिराभवानी गाउँपालिका–१ बलुवा क्षेत्रमा आगलागीका कारण घरबारविहीन बनेको एक परिवारलाई खाद्यान्न सहयोग उपलब्ध गराइएको छ भने उनीहरूको आवास पुनर्निर्माण गरिदिने प्रतिवद्धता पनि व्यक्त गरिएको छ ।
स्थानीय मोटर मुखियाको घर गत बिहीबार राति करिब ११ः३० बजे लामखुट्टे भगाउन बालिएको मच्छरधुपबाट सल्किएको आगोका कारण पूर्ण रूपमा जलेर नष्ट भएको थियो । आगलागीले घरभित्र रहेका सम्पूर्ण सामग्री खरानीमा परिणत भएका छन् ।
पीडित परिवारको दयनीय अवस्थाबारे जानकारी पाएपछि राष्ट्रिय स्वतन्त्र पार्टी (रास्वपा) का युवा नेता तथा जगरनाथपुर गाउँपालिका–२ जानकीटोल निवासी सन्तोष कुमार आफैं घटनास्थल पुगेर राहत वितरण गरेका हुन् । उनले २ बोरा चामल, १ बोरा आलु, १ प्याकेट प्याज र १ बोरा चिउरा लगायतका अत्यावश्यक खाद्यान्न सामग्री हस्तान्तरण गरेका छन् ।
साथै, सन्तोष कुमारले आफ्नै व्यक्तिगत लगानीमा पीडित परिवारका लागि अस्थायी झोपडी निर्माण गरिदिने घोषणा गरेका छन्, जसले पीडितलाई केही राहत मिल्ने अपेक्षा गरिएको छ । आगलागीका कारण घरमा सुरक्षित राखिएको करिब ६ लाख रुपैयाँ नगदसमेत जलेर नष्ट भएको पीडितले बताएका छन् । उक्त रकम केही दिनअघि मात्र लघुवित्त विकास बैंकबाट घर निर्माणकै लागि ऋण स्वरूप लिइएको थियो । यसका अतिरिक्त चार वटा बाख्रा र एक गाई पनि आगोमा जलेर मरेका छन् ।
हाल पीडित परिवार चरम कठिनाइमा जीवन यापन गर्न बाध्य भएको छ । स्थानीयवासीहरूले उनीहरूको पुनःस्थापनाका लागि थप सहयोग आवश्यक रहेको औंल्याउँदै सबै सरोकारवाला तथा सर्वसाधारणसँग सहयोगको अपिल गरेका छन् ।
प्रतिक्रिया दिनुहोस् !