वीरगंज (पर्सा), २८ चैत । सरकारी कार्यालयमा हुने ढिलासुस्ती र भ्रष्टाचार अन्त्य गर्ने उद्देश्यसहित सरकारले घोषणा गरेको ‘शून्य बाँकी फाइल सप्ताह (जेरो पेन्डिङ फाइल वीक) अभियानबीच पर्साको मालपोत कार्यालय प्रमुखमाथि गम्भीर अनियमितताको आरोप सार्वजनिक भएको छ ।
प्रधानमन्त्री कार्यालयले चैत २७ गते सबै मन्त्रालय, विभाग तथा स्थानीय तहलाई परिपत्र गर्दै वैशाख ७ गतेभित्र कुनै पनि फाइल निर्णयविहीन अवस्थामा नराख्न कडा निर्देशन दिएको थियो । तर, पर्सा मालपोत कार्यालयका प्रमुख खेमराज खत्रीमाथि उक्त निर्देशन विपरीत कार्य गर्दै सेवाग्राहीको फाइल लामो समयदेखि अड्काएको आरोप लागेको छ ।
भारतको रक्सौल निवासी जग्गाधनी अनिल कुमार साहले आफ्नो बाजेको नाममा रहेको जग्गा नामसारीका लागि प्रक्रिया अघि बढाउँदा कार्यालय प्रमुख खत्रीले १० लाख रुपैयाँ घुस मागेको र रकम नदिएपछि करिब तीन महिनादेखि फाइल रोकेर राखेको आरोप सार्वजनिक भएको छ । साहले पत्रकार सम्मेलनमार्फत उक्त विषय बाहिर ल्याएका हुन् ।
साहका अनुसार सुरुमा स्थानीय पत्रिकामा सूचना प्रकाशित गरी प्रक्रिया अघि बढाइएको थियो । तर पछि कार्यालय प्रमुखले गोरखापत्रमा सूचना प्रकाशन गर्नुपर्ने भन्दै काम रोकिएको थियो । घुस मागिएको आरोप सार्वजनिक भएपछि प्रमुख खत्रीले आफूमाथि लागेको आरोप प्रमाणित नभएसम्म काम अघि नबढाउने अडान लिएको बताइएको छ ।
यसैबीच, पीडित साहले आफूलाई कार्यालय प्रमुखबाट धम्कीसमेत आएको दाबी गरेका छन् । ‘प्रहरी लगाएर पक्राउ गरिदिन्छु भन्ने धम्कीपछि म वीरगंज आउन सकेको छैन,’ साहको भनाई छ । यता, मालपोत कार्यालय प्रमुख खत्रीले भने फाइल शंकास्पद रहेको दाबी गर्दै सेवाग्राहीले लगाएको घुस आरोप प्रमाणित गर्नुपर्ने बताएका छन् । उनले साहमाथि कानुनी प्रक्रिया अघि बढाइएको र जिल्ला प्रशासन कार्यालयमा समेत उजुरी दर्ता गरिएको जानकारी दिएका छन् ।
यसैबीच अनिल साहको काममा सहयोग गर्दै आएका शुभलाभ भू–सेवा सञ्चालक ओमप्रकाश यादवले स्थानीय पत्रिकामा सूचना प्रकाशित भइसकेको अवस्थामा थप अवरोध सिर्जना गर्नुको औचित्य नरहेको भन्दै फाइल तीन महिनासम्म रोक्नुको कारण अस्पष्ट रहेको बताएका छन् । घटनाले सरकारी कार्यालयमा सुशासन र पारदर्शिताको प्रश्न फेरि एकपटक उठाएको छ । प्रधानमन्त्रीको ‘शून्य बाँकी फाइल सप्ताह’ अभियान घोषणा भएको अवस्थामा नै पर्सामा आएको यो विवादले अभियान कार्यान्वयनमै चुनौती देखिएको टिप्पणी गरिएको छ । 
प्रतिक्रिया दिनुहोस् !