वीरगंज (पर्सा), २६ चैत । वीरगंजमा यही चैत २८ गते जगन्नाथ रथ यात्रा आयोजना गरिने भएको छ । अन्तर्राष्ट्रिय कृष्णभावनामृत संघ (इस्कोन) वीरगंजले तेस्रो पटक श्री जगन्नाथ रथ यात्रा २०८२ आयोजना गर्न लागेको हो ।
इस्कोनका अनुसार चैत २८ गते शनिबार दिउँसो १ बजेदेखि गहवा माई मन्दिर अगाडिको पार्कबाट रथ यात्रा सुरु हुनेछ । यात्रा आदर्शनगर, मकालु होटल चोक, पूजन होटल चोक, कैलाश होटल चोक, घडीअर्वा पोखरी र गीता मन्दिर रोड हुँदै पुनः माइस्थानस्थित मन्दिर अगाडिकै पार्कमा पुगेर समापन गरिने कार्यक्रम रहेको छ ।
वैदिक परम्पराअनुसार मनाइने श्री जगन्नाथ रथ यात्रा पवित्र तथा हर्षोल्लासपूर्ण पर्वका रूपमा मनाइने गरिन्छ । सो अवसरमा भगवान् जगन्नाथ, भगवान् बलदेव तथा सुभद्रा महारानीको रथयात्रा निकालिने इस्कोनले जनाएको छ ।
समाजमा एकता, भक्ति र समानताको सन्देश प्रवाह गर्ने उद्देश्यले आयोजना गरिने रथ यात्रामा चारदेखि छ हजार श्रद्धालु भक्तजनको सहभागिता रहने अनुमान गरिएको इस्कोन वीरगंजका मुक्तिनाथ साहले जानकारी दिए । 
प्रतिक्रिया दिनुहोस् !