वीरगंज (पर्सा), १९ चैत । कुमारी बैंक लिमिटेडले आफ्नो २५औँ वार्षिकोत्सवलाई सामाजिक सेवासँग जोड्दै मधेश प्रदेशका वीरगंज र जनकपुरमा रक्तदान कार्यक्रम आयोजना गरेको छ । सामाजिक उत्तरदायित्वअन्तर्गत सञ्चालन गरिएको उक्त कार्यक्रममा सहभागीहरूको उत्साहजनक उपस्थिति देखिएको थियो ।
बैंकका मधेश प्रदेशका सञ्चालक अधिकृत रञ्जित कुमार यादवका अनुसार वीरगंजमा ५७ जना र जनकपुरमा ३१ जना गरी कुल ८८ जनाले रक्तदान गरेका छन् । उनले यस्तो पहलले आपतकालीन अवस्थामा रगतको अभाव कम गर्न उल्लेखनीय सहयोग पुग्ने विश्वास व्यक्त गरे ।
यसैगरी, मधेश प्रदेश प्रमुख अङ्कित पाण्डेले वार्षिकोत्सवलाई औपचारिकतामा सीमित नराखी सामाजिक उत्तरदायित्वसँग जोड्दै सातै प्रदेशमा रक्तदानसहित विविध कार्यक्रम सञ्चालन गरिएको जानकारी दिए । उनका अनुसार यस्ता गतिविधिले समाजमा सकारात्मक सन्देश प्रवाह गर्ने काम गर्छ ।
वीरगंजमा सम्पन्न कार्यक्रममा रक्तसञ्चार केन्द्र पर्साका प्रमुख सौरभ राज पाण्डेको नेतृत्वमा प्राविधिक टोलीले आवश्यक सहजीकरण गरेको थियो । कार्यक्रमलाई सफल बनाउन बैंकका कर्मचारी, बीमा क्षेत्रका प्रतिनिधि तथा विभिन्न संघ–संस्थाका सदस्यहरूको उल्लेखनीय सहभागिता रहेको थियो ।
प्रतिक्रिया दिनुहोस् !