कलैया (बारा), ६ चैत । बारा निर्वाचन क्षेत्र नम्बर–४ बाट निर्वाचित राष्ट्रिय स्वतन्त्र पार्टी (रास्वपा) का संघीय सांसद रहबर अन्सारीले नेपाल कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’लाई भोट होइन, चरित्र मूल्यांकन गर्न सुझाव दिएका छन् ।
नेकपा अध्यक्ष दाहालले ‘घण्टी’ चुनाव चिन्हमा मतदान गर्ने आफ्ना नेता–कार्यकर्तामाथि कारबाही गर्ने चेतावनी दिएपछि अन्सारीले त्यसप्रति प्रतिक्रिया जनाएका हुन् । उनले लोकतन्त्रमा गोप्य मतदानको विशेष महत्व रहने उल्लेख गर्दै यसलाई शंका गर्ने होइन, सम्मान गर्ने संस्कार आवश्यक रहेको बताएका छन् ।
सामाजिक सञ्जाल फेसबुकमार्फत आफ्नो धारणा सार्वजनिक गर्दै अन्सारीले वास्तविक सुधार चाहने हो भने आयस्रोत स्पष्ट नभए पनि विलासी जीवन बिताउने नेता, व्यवसायीलाई धम्की दिएर चन्दा असुल्ने समूहका सदस्यहरूलाई कारबाही गर्नुपर्ने उल्लेख गरेका छन् ।
उनले थप्दै ठेक्का–पट्टा लिएर सिंहदरबार धाउने दलाल, सरकारी कर्मचारीसँग अनुचित सुविधा माग्ने प्रवृत्ति र कमिसनमा योजना बेच्ने प्रतिनिधिहरूमाथि कडाइ गर्नुपर्नेमा जोड दिएका छन् ।
अन्सारी यसअघि माओवादी केन्द्रमा रहँदा अध्यक्ष प्रचण्डका निकट मानिन्थे। २०७९ सालको निर्वाचनमा उनी माओवादी केन्द्रकै तर्फबाट पर्सा क्षेत्र नम्बर–१ (क) बाट प्रदेशसभा सदस्यमा निर्वाचित भएका थिए ।
प्रतिक्रिया दिनुहोस् !