वीरगंज (पर्सा), ६ चैत । पर्साको सखुवाप्रसौनी गाउँपालिका–१ स्थित मधुवन मथवल क्षेत्रअन्तर्गत कोइलाभार जंगलको आसपासमा ‘कोईलाभार जंगल रिसोर्ट’ सञ्चालनमा आएको छ । शुक्रबार आयोजित एक कार्यक्रमबीच पर्सा क्षेत्र नम्बर–२ का प्रतिनिधिसभा सदस्य सुशील कुमार कानुले रिसोर्टको औपचारिक उद्घाटन गरेका हुन् ।
उद्घाटन समारोहमा बोल्दै सांसद कानुले यस्ता पर्यटकीय संरचनाले ग्रामीण क्षेत्रमा रोजगारीका अवसर सिर्जना गर्नुका साथै स्थानीय संस्कृति र स्वादको अनुभव लिन सकिने वातावरण निर्माण गर्ने बताए । साथै, उनले यस्तो पहलले ग्रामीण भेगलाई वीरगञ्जसँग जोड्ने महत्वपूर्ण कडीको रूपमा काम गर्ने धारणा व्यक्त गरे ।
रिसोर्टका सञ्चालक सुनिल पटेलका अनुसार करिब एक बिघा क्षेत्रफलमा फैलिएको यस परियोजनामा झण्डै एक करोड रुपैयाँ लगानी गरिएको छ । उनले यो रिसोर्टले वीरगञ्ज र कोइलाभार क्षेत्रबीच पर्यटन प्रवद्र्धनमा पुलको भूमिका खेल्ने विश्वास व्यक्त गरे ।
रिसोर्टमा परिवारसहित बस्न मिल्ने आधुनिक तथा सुविधासम्पन्न कोठाहरू, स्विमिङ पुल र ‘लाइभ फिसिङ’को विशेष आकर्षण रहेको छ । साथै, स्थानीय परम्परागत स्वादलाई प्राथमिकता दिँदै दाउरामा पकाइने खाना र सिलौटामा मसला पिसेर बनाइने परिकारहरू पनि उपलब्ध गराइने व्यवस्था गरिएको सञ्चालक पटेलले जानकारी दिए ।
प्रतिक्रिया दिनुहोस् !