वीरगंज (पर्सा), ६ चैत । वीरगंजको मुख्य बजार क्षेत्र गीता मन्दिर रोडमा गरिएको संयुक्त अनुगमनमा सरसफाइ, मूल्यसूची र कानुनी कागजातमा कमजोरी देखिएका ४ व्यवसायीलाई कुल रु २५ हजार जरिवाना गरिएको छ ।
अनुगमन वाणिज्य, आपूर्ति तथा उपभोक्ता संरक्षण कार्यालय वीरगञ्जको नेतृत्वमा गरिएको थियो । टोलीले फुड गार्डेन, लक्ष्मी सेकुवा होटल, नेवा सेकुवा पस र सोखिन मस्म सेन्टरको निरीक्षण गर्दै खाद्य स्वच्छता, भान्सा क्षेत्रको सरसफाइ, खाद्य सामग्री भण्डारण, पानीको गुणस्तर र कर्मचारीको व्यक्तिगत सरसफाइमा ध्यान दिएको थियो ।
निरीक्षणको क्रममा केही व्यवसायीले मूल्यसूची नदेखाउनु, आवश्यक कागजात अद्यावधिक नगर्नु र सरसफाइ मापदण्ड पालना नगर्नु जस्ता कमजोरी देखिएपछि तत्काल सुधार गर्न निर्देशन दिई जरिवाना गरिएको हो । अनुगमन टोलीले भविष्यमा पनि यस्ता व्यवसायहरूको कडा निगरानी जारी रहने बताए । टोलीले व्यवसायीहरूलाई उपभोक्तालाई सुरक्षित तथा गुणस्तरीय खाद्य सेवा उपलब्ध गराउन सचेत गराउँदै मापदण्ड पालना नगर्ने भए थप कडा कारबाही गरिने चेतावनी दिएको छ ।
अनुगमनमा वाणिज्य, आपूर्ति तथा उपभोक्ता संरक्षण कार्यालयका मधुलेश प्रसाद साह, खाद्य प्रविधि तथा गुण नियन्त्रण कार्यालयका श्रवण कुमार साह, जिल्ला प्रशासन कार्यालयका ब्रह्मदेव यादव, उपभोक्ता हित संरक्षण मञ्चका अजित भुजेल, वीरगंज उद्योग वाणिज्य संघका मनोज कुमार दास, जिल्ला प्रहरी कार्यालय पर्साका प्रहरी सहायक निरीक्षक रामबाबू प्रसाद यादव र सञ्चारकर्मी अभिलाष गुप्ता सहभागी थिए ।
प्रतिक्रिया दिनुहोस् !