वीरगंज (पर्सा), ५ चैत । वीरगंज भन्सार कार्यालयबाट जाँचपास भएर निस्किएको ट्रकबाट अन्डर बिलिङ गरिएको सामग्री बरामद भएको छ । ट्रकमा रहेका सामानको मूल्याङ्कनमा करिब ७५ प्रतिशतसम्म ‘अन्डर बिलिङ’ गरिएको खुलासा भएको हो ।
वितेको फागुन २५ गते ‘सुनौलो साझा ढुवानी’ मार्फत ना.७ ख. २४१६ नम्बरको ट्रकले मोटर पाट्र्स, हार्डवेयर सामग्री, कपडा, चस्मा तथा चकलेट बोकी आवश्यक प्रक्रिया पूरा गरी भन्सार पास गरेको थियो । तर उक्त ट्रक ‘सेटिङ’ मार्फत विल विजक तथा भन्सार प्रज्ञापनपत्र भन्दा बढि सामान रहेको आशंकामा ललितपुर प्रहरीले नियन्त्रणमा लिएको थियो ।
वीरगंजबाट काठमाडौँतर्फ जाँदै गरेको सो ट्रकलाई जिल्ला प्रहरी कार्यालय ललितपुरले शङ्काको आधारमा नियन्त्रणमा लिएपछि थप अनुसन्धानका लागि राजस्व अनुसन्धान विभागमा पठाएको थियो । विभागीय अनुसन्धान हालै सम्पन्न भएको र सो ट्रकमा रहेका सामानको मूल्याङ्कनमा करिब ७५ प्रतिशतसम्म ‘अन्डर बिलिङ’ गरिएको खुलासा भएको छ ।
सोही आधारमा राजस्व विभागले १९ लाख ३५ हजार रुपैयाँ जरिवाना तोकेको बताइएको छ । घटनाले वीरगंज भंसार प्रशासन एवं त्यहाँका कर्मचारीहरू माथि गम्भिर प्रश्न उठाएको छ ।
प्रतिक्रिया दिनुहोस् !