वीरगंज (पर्सा), ५ चैत । नेपाली कम्युनिस्ट पार्टीको तर्फबाट पर्सा निर्वाचन क्षेत्र नं. २ का प्रतिनिधिसभा सदस्य उम्मेदवार मनोज चौधरी पक्राउ प्रकरणको अनुसन्धान अन्तिम चरणमा पुगेको, पर्सा प्रहरी प्रवक्ता डिएसपी हरिबहादुर बस्नेतले बताएका छन् ।
नेता चौधरीको गाडीमा संकास्पद वस्तु फेला परेपछि उनलाई नियन्त्रणमा लिएर अनुसन्धान सुरु गरिसकेको र अनुसन्धानको अन्तिम चरणमा रहेकाले आजभोलिमै अनुसन्धानको विवरण अदालतमा पेश गर्ने तयारीमा रहेको प्रवक्ता बस्नेतले जानकारी दिए ।
हालै नेपाली कम्युनिस्ट पार्टी जिल्ला समिति पर्साको आयोजनामा सर्वदलीय बैठकबाट नेता मनोज चौधरी सहित पक्राउ परेका अन्य चार जनाको अनुसन्धानमा पर्सा प्रहरीले चासो नदेखाएको आरोप लगाउदै, अनुसन्धान प्रक्रियालाई छिटै सकाउन दबाव दिइएको थियो ।
वितेको फागुन १९ गते सा“झ मौन अवधिको समयमा क्षेत्रबाट वीरगंज फर्किने क्रममा, नेता चौधरी सवार बा १० च १२५० नम्बरको गाडीमा, सुरक्षा जाँचको क्रममा डिकीबाट संकास्पद वस्तु फेला परेको भन्दै, चौधरीसहित चार जनालाई प्रहरीले नियन्त्रणमा लिएको थियो । उनीसहित नेकपा नेता सत्यनारायण थारु, सुरज कार्की र चालक साहब आलम अन्सारीसमेत प्रहरी हिरासतमा रहेका छन् ।
प्रतिक्रिया दिनुहोस् !