जनगरनाथपुर (पर्सा), ३ चैत । पर्साको जगरनाथपुर गाउँपालिकामा बढ्दो लामखुट्टे समस्या नियन्त्रण गर्न औषधि छर्ने अभियान सुरु गरिएको छ । गाउँपालिकाले वडा नं. ५ मसिहानीबाट मंगलबारदेखि स्प्रे कार्यक्रमको औपचारिक थालनी गरेको हो । गाउँपालिका अध्यक्ष श्रीकान्त प्रसाद यादवले अभियानको उद्घाटन गर्दै यस कार्यक्रमलाई क्रमिक रूपमा सबै वडामा विस्तार गरिने जानकारी दिए ।
उनले यस्तो पहलले डेंगु, मलेरिया जस्ता लामखुट्टेबाट सर्ने रोगहरूको जोखिम कम गर्न सहयोग पुग्ने विश्वास व्यक्त गरे । गाउँपालिकाका अनुसार पछिल्लो समय स्थानीय बासिन्दाबाट लामखुट्टेको प्रकोप बढ्दै गएको गुनासो आएपछि यो अभियान अघि बढाइएको हो । जनस्वास्थ्यलाई ध्यानमा राख्दै समयमै नियन्त्रणका उपाय अपनाइएको जनाइएको छ ।
यसैबीच, स्प्रे कार्यक्रम सञ्चालन भइरहँदा गाउँपालिकाले सर्वसाधारणलाई आवश्यक सावधानी अपनाउन आग्रह गरेको छ । विशेषगरी औषधि छर्दा झ्याल–ढोका खुला राख्न, बालबालिका, वृद्धवृद्धा तथा पशुपन्छीको सुरक्षामा ध्यान दिन अनुरोध गरिएको छ । गाउँपालिकाले लामखुट्टे नियन्त्रणका लागि सरसफाइमा ध्यान दिन र घर–आँगन वरिपरि पानी जम्न नदिने जस्ता उपाय अपनाउन समेत स्थानीयवासीलाई सचेत गराएको छ ।
प्रतिक्रिया दिनुहोस् !