५२ हजार ३०० पिस ट्रामाडोलसहित दुईजना पक्राउ

वीरगंज (पर्सा), १ चैत । जिल्ला प्रहरी कार्यालय पर्साले प्रतिबन्धित औषधि ट्रामाडोलको ठूलो परिमाणसहित दुई जनालाई पक्राउ गरेको छ । प्रहरीका अनुसार वीरगंज महानगरपालिका–१४ गण्डक चोकस्थित सडक खण्डमा सवारी साधन चेकजाँच गर्ने क्रममा काठमाडौं जाँदै गरेको टाटा सुमोबाट ५२ हजार ३०० वटा ट्रामाडोल क्याप्सुल बरामद गरिएको हो ।

२०८२ फागुन ३० गते करिब दिउँसो १२ः३५ बजे गण्डक प्रहरी चौकीबाट खटिएको टोलीले चेकजाँच गर्ने क्रममा शंकास्पद देखिएको ना.१ ज २७६८ नम्बरको टाटा सुमो रोकेर तलासी गरेको थियो । तलासीका क्रममा गाडीको छतमा पहेँलो त्रिपालले ढाकेर राखिएको झोलाभित्र र अर्को झोलाभित्र लुकाइछिपाइ राखिएको ‘ट्रामाडोल हाइड्रोक्लोराइट क्याप्सुल्स आईपि ५० एम.जी.’ लेखिएको ठूलो परिमाणको औषधि फेला परेको प्रहरीले जनाएको छ ।

बरामद गरिएका ट्रामाडोल क्याप्सुलको संख्या ५२ हजार ३०० रहेको छ । ट्रामाडोलसँगै प्रहरीले उक्त प्रकरणमा संलग्न रहेको आरोपमा दुई जनालाई नियन्त्रणमा लिएको छ । पक्राउ पर्नेहरुमा बारा जिल्ला परवानीपुर गाउँपालिका–१ रैहिया टोल बस्ने ४२ वर्षीय राम आशिष राउत र पर्सा जिल्ला बहुदरमाई नगरपालिका–२ सिसियाडी बस्ने ३० वर्षीय सुवास सर्राफ रहेका छन् । उनीहरूलाई बरामद औषधिसहित नियन्त्रणमा लिई लागुऔषध सम्बन्धी कसुरमा अनुसन्धान सुरु गरिएको प्रहरीले जनाएको छ ।

जिल्ला प्रहरी कार्यालय पर्साका प्रवक्ता प्रहरी नायब उपरीक्षक राजु कार्कीका अनुसार पक्राउ परेकामाथि थप अनुसन्धानका लागि पर्सा जिल्ला अदालतबाट ७ दिनको म्याद थप अनुमति लिइएको छ । प्रहरीले पछिल्लो समय सीमावर्ती क्षेत्र हुँदै प्रतिबन्धित औषधि ओसारपसारका घटनाहरू बढ्दै गएको भन्दै निगरानी र चेकजाँच कडाइ गरिएको जनाएको छ ।