वीरगंज (पर्सा), २४ फागुन । भारत–नेपाल सीमा क्षेत्रमा मानव तस्करीको प्रयासलाई असफल बनाउँदै भारतीय सीमावर्ती सहर रक्सौल स्थित सशस्त्र सीमा बल (एस.एस.बी.) को मानव तस्करी विरोधी इकाई (एएचटियु) ले एक नाबालिग किशोरीलाई सुरक्षित रूपमा उद्दार गरेको छ । प्राप्त सूचनाको आधारमा एस.एस.बी.को ४७ औँ वाहिनी अन्तर्गतको ए.एच.टि.यु. टोलीले सीमा क्षेत्रमा आवतजावत गर्ने व्यक्तिमाथि विशेष निगरानी बढाएको थियो ।
सोही क्रममा भारतबाट नेपालतर्फ आउँदै गरेका दुई जना संदिग्ध युवकलाई एक किशोरीसहित मित्तेरी पुल नजिकै रोकेर सोधपुछ गरिएको थियो । प्रारम्भिक बयानका क्रममा उनीहरूले किशोरी आफ्नै बहिनी भएको र आफन्तको घर जान नेपालतर्फ लागेको बताएका थिए । तर उनीहरूको भनाईमा असंगति देखिएपछि ए.एच.टि.यु. टोलीले थप अनुसन्धान अघि बढाएको थियो ।
अनुसन्धानलाई प्रभावकारी बनाउन प्रयास जुभनिल एड सेन्टर, स्वीच रक्सौल, ग्राम नियोजन केन्द्र जस्ता संस्थाको सहयोगमा तीनै जनालाई अलग–अलग राखेर सोधपुछ तथा काउन्सेलिङ गरिएको थियो । त्यस क्रममा उद्दार गरिएकी किशोरी ‘रानी कुमारी’ (परिवर्तित नाम) भारतको बिहार राज्यस्थित मोतिहारी जिल्लाको पताही थाना क्षेत्रकी रहेको खुलेको छ ।
त्यस्तै घटनामा संलग्न आरोपितमध्ये मोहम्मद अरमान (उर्फ गोलु) नेपालका वीरगंज निवासी रहेको खुलासा भएको छ भने अर्का आरोपी इकबाल अन्सारी (उर्फ सोनु) भारतको बिहार राज्यको नरकटियागञ्ज अन्तर्गत शिकारपुर थाना क्षेत्रका बासिन्दा रहेको प्रहरी स्रोतले जनाएको छ ।
प्रारम्भिक अनुसन्धानमा मोहम्मद अरमानले ‘गोलु’ नाम प्रयोग गर्दै टिकटक मार्फत करिब चार महिनाअघि किशोरीसँग चिनजान बढाएको र पछि प्रेम सम्बन्धको नाटक गर्दै विवाहको झुटो आश्वासन दिएको पत्ता लागेको छ । त्यसपछि आफ्ना सहयोगी इकबाल अन्सारीसँग मिलेर किशोरीलाई विभिन्न प्रलोभन देखाउँदै घरबाट भाग्न प्रेरित गरिएको अनुसन्धानमा खुलेको छ ।
किशोरी घरबाट निस्केर मोतिहारी बसपार्क पुगेपछि दुवै आरोपीले उनलाई भारतबाट नेपाल ल्याउने योजना बनाएका थिए । तर ए.एच.टि.यु.को सक्रिय निगरानी र समयमै गरिएको कारबाहीका कारण उनीहरूको योजना असफल भएको हो । टोलीले किशोरीलाई सुरक्षित रूपमा उद्धार गर्न सफल भएको छ ।
उद्दार गरिएकी किशोरी र दुवै आरोपीलाई थप कानुनी प्रक्रिया अगाडि बढाउन हरैया थानालाई बुझाइएको छ । प्रहरीका अनुसार आरोपितहरूविरुद्ध मुद्दा दर्ता गरी घटनाबारे थप अनुसन्धान जारी रहेको छ । उद्दार अभियानमा ए.एच.टि.यु.का इन्स्पेक्टर विकास कुमारको नेतृत्वमा सहायक उपनिरीक्षक खेमराज, हवलदार अरविन्द द्विवेदी, सिपाही साधना सिन्हा र अन्जु मोहन सहभागी थिए । साथै प्रयास जुवेनाइल एड सेन्टरकी आरती कुमारी र राज गुप्ता, स्वच्छ रक्सौलका रञ्जित सिंह र साबरा खातुन तथा ग्राम नियोजन केन्द्रका अरविन्द पाण्डे र रेखा देवीको पनि सक्रिय सहयोग रहेको थियो ।
प्रतिक्रिया दिनुहोस् !