वीरगंज (पर्सा), २४ फागुन । पर्सा जिल्लाका चारवटै प्रतिनिधिसभा निर्वाचन क्षेत्रमा यसपटक मतदाताले नयाँ राजनीतिक विकल्पलाई रोज्दै ऐतिहासिक परिणाम दिएका छन् । चारै क्षेत्रमा राष्ट्रिय स्वतन्त्र पार्टी (रास्वपा)का उम्मेदवार विजयी भएसँगै पर्साको राजनीतिक समीकरण नै परिवर्तन भएको छ । लामो समयदेखि प्रभाव कायम गर्दै आएका नेपाली कांग्रेस र नेकपा (एमाले) जस्ता स्थापित दललाई मतदाताले स्पष्ट सन्देश दिएका छन् ।
पर्सा निर्वाचन क्षेत्र नम्बर–१ मा रास्वपाका उम्मेदवार बुद्धि प्रसाद पन्त (हरि पन्त) विजयी भएका छन् । मुख्य निर्वाचन अधिकृत गायत्री प्रसाद रेग्मीका अनुसार पन्तले २७ हजार २ सय ७४ मत प्राप्त गर्दै एमालेका उम्मेदवार तथा पूर्वमन्त्री प्रदीप यादवलाई १४ हजार २ सय ४४ मतान्तरले पराजित गरेका हुन् । यादवले १३ हजार ३० मत प्राप्त गरेका छन् भने कांग्रेसका उम्मेदवार अनिल रुंग्टाले ११ हजार ८ सय ८५ मत ल्याउँदै तेस्रो स्थानमा सीमित भए ।
निर्वाचन परिणाम सार्वजनिक भएपछि प्रदीप यादवले जनताको निर्णयलाई सम्मानपूर्वक स्वीकार गरेका छन् । सामाजिक सञ्जालमार्फत उनले लोकतन्त्रको मूल सौन्दर्य जनताको मतलाई सर्वोच्च मान्नुमा रहेको उल्लेख गर्दै मतदाताको निर्णय आफ्नो लागि मार्गदर्शक रहने बताएका छन् । साथै उनले विजयी पन्तलाई बधाई दिँदै सफल कार्यकालको शुभकामना व्यक्त गरेका छन् ।
त्यसैगरी पर्सा निर्वाचन क्षेत्र नम्बर–२ मा पनि रास्वपाका उम्मेदवार सुशिल कुमार कानुले शानदार जित हासिल गरेका छन् । उनले ३० हजार ७४० मत प्राप्त गर्दै कांग्रेसका उम्मेदवार तथा पूर्वमन्त्री अजय चौरसियालाई १८ हजार ८५० मतान्तरले पराजित गरेका हुन् । चौरसियाले ११ हजार ८९० मत प्राप्त गरे भने एमालेकी उम्मेदवार रिमा कुमारी यादव ले ११ हजार ६०५ मत ल्याएकी छन् ।
निर्वाचनपछि रिमा यादवले मतदाताप्रति आभार व्यक्त गर्दै लोकतन्त्रमा जनताको निर्णय नै अन्तिम हुने बताएकी छन् । उनले विजयी कानुलाई बधाई दिँदै पर्सा–२ को विकासका लागि आफू निरन्तर सक्रिय रहने प्रतिबद्धता पनि व्यक्त गरेकी छन् ।
यसैगरी पर्सा–३ मा रास्वपाका उम्मेदवार रामाकान्त चौरसिया २९ हजार ६७९ मतसहित विजयी भएका छन् । उनका निकटतम प्रतिद्वन्द्वी कांग्रेसका उम्मेदवार सुरेन्द्रप्रसाद चौधरीले १६ हजार ३६६ मत प्राप्त गरेका छन् भने एमालेका उम्मेदवार रूपेशकुमार पाण्डेले ११ हजार ९१४ मत ल्याएका छन् ।
त्यस्तै पर्सा–४ मा रास्वपाका उम्मेदवार टेकबहादुर शाक्य २८ हजार ६ मतसहित निर्वाचित भएका छन् । कांग्रेसका उम्मेदवार रमेश रिजालले १२ हजार ५३३ मत र एमालेका उम्मेदवार जालिम मियाँ मन्सुरीले १२ हजार १४६ मत प्राप्त गरेका छन् ।
पर्साका चारै क्षेत्रमा रास्वपाको जितसँगै यहाँको राजनीतिक परिदृश्यमा उल्लेखनीय परिवर्तन देखिएको छ । लामो समयदेखि परम्परागत दलको प्रभाव रहेको पर्सामा यसपटक मतदाताले नयाँ राजनीतिक विकल्पप्रति विश्वास व्यक्त गरेको विश्लेषण गरिएको छ । यो परिणामले स्थापित दलहरूलाई आफ्नो कार्यशैली र जनतासँगको सम्बन्ध पुनः समीक्षा गर्नुपर्ने सन्देश दिएको छ ।
प्रतिक्रिया दिनुहोस् !