वीरगंज (पर्सा), १५ फागुन । उज्यालो नेपाल पार्टीका तर्फबाट पर्सा निर्वाचन क्षेत्र नं. १ का प्रतिनिधिसभा सदस्य उम्मेदवार रामकिशोर सिंह (पराग) ले आइतबार वीरगंज महानगरपालिका–२१ अन्तर्गत परवानीपुर, ताजपुर, कोइरिया टोल र ततवा टोलमा घरदैलो अभियान सञ्चालन गरेका छन् । घरदैलोका क्रममा स्थानीय बासिन्दा तथा युवाहरूले सिंहलाई फूलमाला र खादा ओढाएर स्वागत गर्दै समर्थन जनाएका थिए। कार्यक्रममा उल्लेख्य जनसहभागिता देखिएको थियो ।
भेटघाटका अवसरमा स्थानीयहरूले विगतमा विभिन्न राजनीतिक दल र उम्मेदवारहरूले निर्वाचनताका आकर्षक प्रतिबद्धता जनाए पनि विकास निर्माण र रोजगारी सिर्जनामा ठोस उपलब्धि हासिल गर्न नसकेको गुनासो राखे । चुनाव नजिकिँदा युवाहरूलाई आश्वासन दिएर प्रयोग गर्ने तर पछि जनतासँग दूरी बढाउने प्रवृत्ति अन्त्य हुनुपर्ने उनीहरूको धारणा थियो । सक्षम, इमानदार र नयाँ सोच भएका उम्मेदवारलाई आगामी निर्वाचनमा साथ दिने प्रतिबद्धता समेत स्थानीयहरूले व्यक्त गरे ।
यसक्रममा उनीहरूले पार्टीका अध्यक्ष कुलमान घिसिङलाई परिणाममुखी नेतृत्वका रूपमा प्रशंसा गर्दै सिंहप्रति भरोसा व्यक्त गरेका थिए । उम्मेदवार सिंहले निर्वाचित भएलगत्तै स्थानीय समस्याको समाधानलाई प्राथमिकतामा राख्ने प्रतिबद्धता जनाउँदै शिक्षा, स्वास्थ्य र रोजगारीलाई केन्द्रमा राखेर योजनाबद्ध विकास कार्यक्रम अघि बढाइने बताए । साथै, स्थानीय तहमै उद्योग–कलकारखाना स्थापना गरी दक्ष र योग्य जनशक्तिलाई रोजगारी उपलब्ध गराउने योजना रहेको जानकारी दिए ।
वीरगंज महानगरपालिका–२० का निर्वाचित प्रतिनिधिका रूपमा हासिल अनुभवलाई संघीय संसदसम्म पुर्याई समग्र क्षेत्रको हितमा प्रभावकारी आवाज उठाउने अठोट पनि उनले व्यक्त गरे । कार्यक्रमको समापनमा स्थानीयहरूले सिंहलाई विजयको अग्रिम शुभकामना दिँदै आगामी निर्वाचनमा पूर्ण समर्थन रहने विश्वास दिलाएका थिए । 
प्रतिक्रिया दिनुहोस् !