वीरगंज (पर्सा), १४ फागुन । जिल्ला प्रशासन कार्यालय पर्साले फागुन १५ देखि लागू हुने गरी मदिरा व्यवसाय तथा बिक्री वितरण बन्द गर्ने निर्णय गरेपछि पर्साका मदिरा व्यवसायीहरू आक्रोशित भएका छन् । उक्त निर्णयप्रति पर्सा मदिरा व्यवसायी संघले गम्भीर ध्यानाकर्षण गराउँदै तत्काल पुनर्विचारको माग गरेको छ । संघले जारी गरेको विज्ञप्तिमा प्रशासनको निर्णयले व्यवसायीहरूलाई गम्भीर आर्थिक संकटमा धकेल्ने उल्लेख गरिएको छ ।
हाल देशको आर्थिक अवस्था कमजोर रहेको, बजारमा क्रयशक्ति घटेको र व्यवसाय सञ्चालनमै चुनौती बढिरहेको सन्दर्भमा यस्तो निर्णयले थप समस्या निम्त्याउने संघको भनाइ छ । संघका अनुसार मदिरा व्यवसाय राज्यलाई कर तिर्ने प्रमुख क्षेत्रमध्ये एक हो । वर्षौंदेखि व्यवसायीहरूले राज्यको राजस्वमा महत्वपूर्ण योगदान दिँदै आएका छन् । तर यही क्षेत्रलाई लक्षित गर्दै अचानक बिक्री बन्द गर्ने निर्णय लिनु न्यायोचित नभएको उनीहरूको तर्क छ ।
विशेषगरी होलीजस्ता पर्व नजिकिँदै गर्दा गरिएको निर्णयले व्यवसायीहरूलाई थप मर्कामा पारेको संघले जनाएको छ । होली वर्षमा एकपटक आउने प्रमुख व्यापारिक सिजन भएकाले धेरै व्यवसायीहरूले बैंक, सहकारी, साथीभाई तथा अन्य स्रोतबाट ऋण लिएर मालसामान खरिद गरी व्यापारको तयारी गरिसकेको अवस्थामा पसल बन्द गर्ने निर्णयले ठूलो घाटा व्यहोर्नुपर्ने अवस्था सिर्जना भएको उनीहरूको गुनासो छ ।
संघले प्रश्न उठाएको छ यदि व्यवसाय सञ्चालन गर्न नदिने हो भने व्यवसायीहरूले लिएको ऋण, बैंकको किस्ता, घरपरिवारको खर्च तथा राज्यलाई तिर्नुपर्ने कर कसरी तिर्ने ? यस अवस्थाको जिम्मेवारी कसले लिने ? विज्ञप्तिमा प्रशासनलाई व्यवसायीहरूको वास्तविक अवस्था बुझ्न र निर्णय पुनर्विचार गर्न आग्रह गरिएको छ । व्यवसायीहरूको समस्या, लगानी र परिस्थितिलाई मध्यनजर गर्दै उपयुक्त समाधान निकाल्न संघले जोडदार माग गरेको छ ।
संघले सम्बन्धित निकायसँग औपचारिक आपत्ति जनाउँदै निर्णय सच्याउन पहल गरिने जनाएको छ । साथै, सम्पूर्ण व्यवसायीहरूलाई संगठित र एकजुट भई आफ्नो हक अधिकारका लागि उभिन पनि आह्वान गरिएको छ । प्रशासनको निर्णय र व्यवसायीहरूको आपत्तिबीच पर्सामा यस विषयले थप बहस जन्माएको छ । अब प्रशासनले व्यवसायीहरूको मागलाई कसरी सम्बोधन गर्छ भन्ने चासो बढेको छ । 
प्रतिक्रिया दिनुहोस् !