बारा,१३ फागुन । राष्ट्रिय स्वतन्त्र पार्टी (रास्वपा) का तर्फबाट बारा निर्वाचन क्षेत्र नम्बर–१ का प्रतिनिधिसभा सदस्य उम्मेदवार गणेश धिमाल ले आफ्नो चुनावी अभियानलाई तीव्रता दिएका छन्। यसैक्रममा बारागढी गाउँपालिका वडा नम्बर–१ बेलवाटोल टोलमा रास्वपा समिति गठन गर्दै व्यापक जनसम्पर्क अभियानलाई थप सशक्त बनाइएको छ।
बेलवाटोल टोलमा आयोजित एक कार्यक्रमबीच रास्वपाको टोल समिति गठन गरिएको हो। समिति गठनको संयोजकमा पशुराम चौधरी, उपसंयोजकमा हरी चौधरी र सलाहकारमा बैजनाथ चौधरी चयन भएका छन्। कार्यक्रममा गाउँपालिकास्तरीय सभापति सनी जयसवालको संयोजन रहेको थियो। नवगठित समितिले टोलस्तरमा संगठन विस्तार, जनसमस्या पहिचान तथा समाधानका लागि सक्रिय भूमिका निर्वाह गर्ने प्रतिबद्धता जनाएको छ।
कार्यक्रममा स्थानीय युवाहरूको उल्लेखनीय उपस्थिति देखिएको थियो। पछिल्लो समय बेलवाटोल क्षेत्रमा रास्वपा प्रति युवाको आकर्षण बढ्दै गएको स्थानीयवासीले बताएका छन्। वैकल्पिक राजनीतिक शक्ति र पारदर्शी नेतृत्वको खोजीमा रहेका युवाहरू रास्वपातर्फ आकर्षित भएको उनीहरूको भनाइ छ।
यस अवसरमा उम्मेदवार गणेश धिमालले टोलबासीसँग प्रत्यक्ष भेटघाट तथा संवाद गर्दै स्थानीय समस्याबारे जानकारी लिएका थिए। स्थानीयहरूले विशेष गरी पूर्वाधार सम्बन्धी समस्यालाई प्रमुख मुद्दाका रूपमा उठाएका छन्। कच्ची तथा जीर्ण सडक, वर्षायाममा हुने हिलो र जलजमाव, ढल निकासको अभाव तथा सडक बत्तीको कमीले दैनिक जीवन प्रभावित भएको गुनासो उनीहरूले गरेका छन्।
त्यस्तै, खानेपानीको समस्या पनि बेलवाटोलका बासिन्दाको प्रमुख चिन्ताको विषय बनेको छ। शुद्ध तथा नियमित खानेपानी आपूर्ति नहुँदा स्थानीयहरू समस्यामा परेका छन्। शिक्षा र स्वास्थ्य क्षेत्रमा समेत आवश्यक पूर्वाधार तथा जनशक्तिको अभाव रहेको जनाइएको छ। विद्यालयमा पर्याप्त शैक्षिक सामग्री र शिक्षकको कमी, स्वास्थ्य चौकीमा औषधि तथा स्वास्थ्यकर्मीको अभावले सेवाग्राहीलाई सास्ती भइरहेको स्थानीयहरूको भनाइ छ।
कृषि तथा रोजगारीको अवस्था पनि सन्तोषजनक नरहेको गुनासो गरिएको छ। सिंचाइ सुविधा अभाव, कृषि उत्पादनको उचित बजार व्यवस्थापन नहुँदा किसान मारमा परेका छन् भने युवाहरू रोजगारीको खोजीमा विदेशिन बाध्य भएका छन्। साथै, सरसफाइको कमी, बाढी–डुबानको जोखिम तथा विभिन्न सामाजिक विकृतिहरूले टोलको समग्र विकासमा अवरोध पुर्याइरहेको स्थानीयवासीले बताएका छन्।
यी सबै समस्यालाई आधार बनाउँदै उम्मेदवार धिमालले आफू निर्वाचित भएमा बेलवाटोलसहित समग्र बारागढी क्षेत्रको दिगो विकासका लागि योजनाबद्ध ढंगले अघि बढ्ने प्रतिबद्धता व्यक्त गरे। उनले पारदर्शिता, जवाफदेहिता र सुशासनलाई प्राथमिकतामा राख्दै स्थानीय तहसँग सहकार्य गरी पूर्वाधार विकास, खानेपानी व्यवस्थापन, शिक्षा–स्वास्थ्य सुधार तथा रोजगारी सिर्जनामा विशेष ध्यान दिने बताए।
धिमालले “जनताको समस्या नै मेरो एजेन्डा हो” भन्दै घरदैलो अभियानमार्फत प्रत्येक टोल–टोलमा पुगेर जनभावना बुझ्ने र समाधानमुखी कार्यक्रम ल्याउने प्रतिबद्धता दोहोर्याए। बेलवाटोलमा सम्पन्न समिति गठन तथा भेटघाट कार्यक्रमले रास्वपाको संगठन विस्तारसँगै चुनावी अभियानलाई थप ऊर्जा प्रदान गरेको सहभागीहरूको भनाइ छ।
यसरी बेलवाटोल टोलमा संगठन सुदृढीकरणसँगै जनसम्पर्क अभियानलाई तीव्र बनाउँदै रास्वपा उम्मेदवार गणेश धिमालले आगामी निर्वाचनलाई लक्षित गर्दै आफ्नो उपस्थितिलाई बलियो बनाएका छन्। स्थानीय मुद्दालाई केन्द्रमा राखेर अघि बढेको अभियानले मतदातामाझ सकारात्मक सन्देश प्रवाह गरेको देखिएको छ। 
प्रतिक्रिया दिनुहोस् !