वीरगंज (पर्सा), १२ फागुन । जनमत पार्टीका तर्फबाट पर्सा क्षेत्र नं. १ का प्रतिनिधिसभा सदस्य उम्मेदवार ओमप्रकाश सर्राफले आफ्नो चुनावी अभियानलाई थप तीव्र बनाउँदै वीरगंज महानगरपालिका–२१ को कुशवाहा टोल र तात्वा टोलमा सघन घरदैलो कार्यक्रम सम्पन्न गरेका छन् । घरघर पुगेर मतदातासँग प्रत्यक्ष संवाद गरेका सर्राफले स्थानीय बासिन्दाका समस्या, सुझाव र अपेक्षाबारे विस्तृत जानकारी लिएका थिए । भेटघाटका क्रममा स्थानीयले दैनिक जीवनसँग गाँसिएका आधारभूत कठिनाइहरू खुलेर राखेका थिए ।
घरदैलोको क्रममा स्थानीयहरुले खानेपानीको समस्या, शिक्षा क्षेत्रमा चुनौतीपूर्ण अवस्थामा रहेको गुनासो गरेका थिए । सरकारी विद्यालयमा शिक्षकको कमी, भौतिक पूर्वाधारको अभाव र गुणस्तरीय शिक्षामा कमी देखिएको बताइएको छ । आर्थिक रूपमा कमजोर परिवारले समेत आफ्ना सन्तानलाई निजी विद्यालयमा पठाउनुपर्ने बाध्यता रहेको भन्दै ग्रामीण क्षेत्र शिक्षामा पछाडि परेको अनुभूति अभिभावकहरूले व्यक्त गरेका छन् ।
यसैगरि स्वास्थ्य सेवाको पहुँच कमजोर हुनु अर्को गम्भीर समस्या रहेको छ । सामान्य उपचारका लागि समेत वीरगंज बजार क्षेत्र धाउनुपर्ने अवस्था रहेको र आकस्मिक बिरामी पर्दा यातायात तथा खर्चको अभावले झन् कठिनाइ हुने गरेको स्थानीयले बताए । कृषि क्षेत्रका किसानहरूले पर्याप्त सिँचाइ नहुँदा उत्पादनमा गिरावट आएको, मलखाद तथा बिउबिजन अभाव र उत्पादनको उचित मूल्य नपाएको समस्या सुनाए ।
स्थानीयका गुनासा सुनेपछि उम्मेदवार सर्राफले विकासको आधार स्थानीय आवश्यकता र जनसहभागिता हुनुपर्ने बताए । खानेपानी, शिक्षा, स्वास्थ्य र कृषि जस्ता आधारभूत क्षेत्रलाई प्राथमिकतामा राखेर योजनाबद्ध रूपमा काम गर्ने प्रतिबद्धता उनले व्यक्त गरे । युवालाई रोजगारी सिर्जना गर्ने कार्यक्रम, किसानमैत्री नीति अवलम्बन गर्ने र सामाजिक न्यायलाई सुदृढ बनाउने आफ्नो प्रमुख एजेन्डा रहेको उनको भनाइ थियो । 
प्रतिक्रिया दिनुहोस् !