वीरगंज (पर्सा), १२ फागुन । उज्यालो नेपाल पार्टीका तर्फबाट पर्सा निर्वाचन क्षेत्र नम्बर–१ का प्रतिनिधिसभा सदस्य पदका उम्मेदवार रामकिशोर सिंह (पराग)ले मंगलबार वीरगंज महानगरपालिका वडा नं. १२ को मुरली गाउँ तथा वडा नं. ८ अन्तर्गत मुरली बगैंचा र पानीटंकी टोलमा घरदैलो अभियान सञ्चालन गरेका छन् ।
घरदैलोका क्रममा स्थानीय बासिन्दाले सिंहलाई फूलमाला र खादा ओढाएर हार्दिक स्वागत तथा सम्मान गरेका थिए । भेटघाटका अवसरमा स्थानीय तथा युवाहरूले विगतमा विभिन्न दल र उम्मेदवारहरूले विकास, रोजगारी र पूर्वाधार सुधारका अनेक प्रतिबद्धता जनाएपनि व्यवहारमा उल्लेखनीय उपलब्धि हासिल हुन नसकेको भन्दै असन्तुष्टि व्यक्त गरे ।
उनीहरूले चुनावको समयमा मात्र युवालाई उपयोग गर्ने, रोजगारीको आश्वासन बाँड्ने र निर्वाचनपछि जनतासँग सम्पर्कविहीन हुने प्रवृत्ति दोहोरिन नदिने चेतावनी दिँदै यसपटक परिणाम दिन सक्ने सक्षम र नयाँ सोच भएका उम्मेदवारलाई समर्थन गर्ने अठोट व्यक्त गरेका छन् ।
स्थानीयवासीहरूले उज्यालो नेपाल पार्टीका अध्यक्ष कुलमान घिसिङको कार्यशैलीको प्रशंसा गर्दै काममुखी नेतृत्वको आवश्यकता औंल्याएका थिए । सोही सन्दर्भमा उम्मेदवार सिंहप्रति आफ्नो विश्वास र समर्थन रहेको पनि बताएका थिए ।
उम्मेदवार सिंहले जनताका आधारभूत समस्यालाई आफू निर्वाचित भएको पहिलो प्राथमिकतामै राख्ने प्रतिबद्धता व्यक्त गरे । शिक्षा, स्वास्थ्य र रोजगारीलाई मुख्य एजेन्डा बनाउँदै स्थानीय उद्योग कलकारखानामा स्थानीय तथा योग्य व्यक्तिलाई रोजगारीमा प्राथमिकता दिलाउने स्पष्ट धारणा उनले राखे । साथै, वीरगंज महानगरपालिका वडा नं. २० मा निर्वाचित भएर काम गर्दा हासिल गरेको अनुभवलाई संघीय संसदमा उपयोग गर्दै क्षेत्रको विकासका मुद्दा प्रभावकारी रूपमा उठाउने उनको भनाइ थियो ।
कार्यक्रममा उल्लेख्य जनसहभागिता देखिएको थियो । स्थानीयहरूले आगामी निर्वाचनमा सिंहको विजयको कामना गर्दै अग्रिम शुभकामना व्यक्त गरेका थिए ।
प्रतिक्रिया दिनुहोस् !