वीरगंज (पर्सा), ११ फागुन । ओमप्रकाश सर्राफ, जनमत पार्टीबाट पर्सा जिल्ला क्षेत्र नम्बर–१ का प्रतिनिधिसभा सदस्य उम्मेदवार, आफ्नो चुनावी प्रचारप्रसार अभियानलाई थप सशक्त बनाउँदै अघि बढेका छन् । आगामी निर्वाचनलाई लक्षित गर्दै सर्राफले क्षेत्रका प्रत्येक वडा र गाउँ टोलमा घरदैलो, प्रत्यक्ष मतदाता भेटघाट र संवाद कार्यक्रम सञ्चालन गर्दै जनसमर्थन जुटाउने रणनीति अपनाएका छन् ।
भेटघाट कार्यक्रम अन्तर्गत वीरगंज महानगरपालिका–१५ भेडियाही र वडा नम्बर–१६ सिवम टोलमा सर्राफले घरदैलो तथा प्रत्यक्ष संवाद सम्पन्न गरेका छन् । कार्यक्रममा स्थानीय बासिन्दा, युवाहरू र महिला समूहको उल्लेखनीय सहभागिता रहेको थियो । विशेष रूपमा महिला टोली परिचालन गरेर घरघर पुगेर मतदाता तथा आम नागरिकसँग प्रत्यक्ष संवाद गर्नुलाई अभियानको महत्वपूर्ण अङ्ग बनाइएको थियो ।
सर्राफले घरदैलो तथा टोलसभा कार्यक्रममा शिक्षा, स्वास्थ्य, रोजगारी सिर्जना र भौतिक पूर्वाधार विकासलाई प्रमुख एजेन्डा बनाउने प्रतिबद्धता व्यक्त गरेका छन् । उनले स्थानीय तहका आवश्यकताहरूलाई केन्द्रमा राख्दै योजनाबद्ध ढङ्गले क्षेत्रीय विकासको काम अघि बढाउने लक्ष्य राखेका छन् । ‘हामी शिक्षा, स्वास्थ्य र रोजगारीमा मात्र नभई सडक, खानेपानी र अन्य पूर्वाधारमा पनि ठोस परिणाम दिन प्रतिबद्ध छौं,’ उनले भने ।
साथै सर्राफले मधेशको हक, अधिकार र पहिचानको लागि संघर्षलाई निरन्तरता दिने प्रतिवद्धता पुनः दोहोर्याएका छन् । कार्यक्रममा सहभागी स्थानीयहरूले पनि क्षेत्रीय हक र विकास सुनिश्चित गर्ने उम्मेदवारको पक्षमा सक्रिय भूमिका निर्वाह गर्ने आश्वासन दिएका छन् । युवासभा र रात्रीसभा कार्यक्रममार्फत सर्राफले विशेष गरी युवा मतदातासँग प्रत्यक्ष संवाद गर्दै उनीहरूको माग, समस्या र सुझाव सुन्ने अवसर पाएका छन् । यसले अभियानलाई जनआकर्षक मात्र नभई व्यापक सहभागितामूलक बनाएको छ ।
जनमत पार्टीका सर्राफको सक्रिय अभियान, महिला र युवा सहभागितामा जोड, साथै विकास र अधिकारका एजेन्डालाई केन्द्रमा राख्नुले निर्वाचनको समीकरणमा सकारात्मक प्रभाव पार्ने बताइएको छ । घरदैलो अभियानले मतदाता विश्वास जित्ने मात्र नभई आगामी निर्वाचनमा क्षेत्रीय मत परिणाममा निर्णायक भूमिका खेल्ने अपेक्षा गरिएको छ ।
सर्राफको चुनावी गतिविधि क्षेत्रमा जनसंपर्क र प्रत्यक्ष संवादमार्फत सघन रूपमा अघि बढिरहेको छ, जसले उनलाई क्षेत्रीय जनसमर्थन जुटाउन र आगामी प्रतिनिधिसभा निर्वाचनमा बलियो प्रतिष्पर्धीको रूपमा प्रस्तुत गर्ने विश्वास स्थानीय तथा पार्टी कार्यकर्ताहरूमा बढाएको छ । 
प्रतिक्रिया दिनुहोस् !