वीरगंज (पर्सा), ११ फागुन । आसन्न प्रतिनिधिसभा निर्वाचनलाई लक्षित गर्दै पर्सा निर्वाचन क्षेत्र नम्बर–२ मा चुनावी सरगर्मी बढ्दै गएको छ । यसै क्रममा जनता समाजवादी पार्टी नेपाल (जसपा) का तर्फबाट प्रतिनिधिसभा सदस्य उम्मेदवार अशोक कुमार टेमानीले विकास, समृद्धि र स्वाभिमानलाई केन्द्रमा राख्दै आफ्नो चुनावी प्रतिबद्धता सार्वजनिक गरेका छन् । वीरगंजको माटोसँग भावनात्मक सम्बन्ध रहेको उल्लेख गर्दै टेमानीले आफू क्षेत्रकै छोरा तथा दाजुभाइको हैसियतले जनताको सेवामा समर्पित रहने बताएका छन् । ‘पर्सा–२ का जनताको हरेक समस्या संसद्मा सशक्त रूपमा उठाउनेछु र सम्बन्धित मन्त्रालय तथा निकायमा पुगेर समाधानका लागि आवश्यक पहल र दबाब सिर्जना गर्नेछु,’ उनले भने ।
टेमानीले वीरगंजलाई पुनः मुलुकको ‘आर्थिक राजधानी’को रूपमा स्थापित गर्न विशेष पहल गर्ने प्रतिबद्धता जनाएका छन् । औद्योगिक र व्यापारिक साख फर्काउन विशेष आर्थिक क्षेत्र र लगानीमैत्री नीति आवश्यक रहेको उनको धारणा छ । उनले उद्योग, व्यापार र लगानीलाई प्रोत्साहन गर्ने वातावरण निर्माण गरी स्थानीय अर्थतन्त्रलाई गतिशील बनाउने लक्ष्य प्रस्तुत गरेका छन् । कृषि क्षेत्रलाई बलियो नबनाई समृद्धि सम्भव नहुने उल्लेख गर्दै टेमानीले मल, बीउ तथा कृषि उपकरणको अभाव हुन नदिने प्रतिबद्धता व्यक्त गरेका छन् । किसानले आफ्नो उत्पादन सिधै बिक्री गर्न सक्ने कृषि बजार (गोला) स्थापना गर्ने योजना उनले अघि सारेका छन् ।
आधुनिक सिँचाइ व्यवस्थाको विस्तार, ‘एक गाउँ–एक उत्पादन’ अवधारणा कार्यान्वयन, उन्नत मूल्यका कृषि उत्पादनमा विशेष प्याकेज तथा निजी–सरकारी साझेदारीमा कोल्ड स्टोरेज स्थापना गर्ने उनको योजना छ । यसले किसानको आम्दानी वृद्धि र कृषि उत्पादनको बजार सुनिश्चित गर्न सहयोग पुग्ने विश्वास उनले व्यक्त गरेका छन् । युवाको बढ्दो वैदेशिक पलायनलाई गम्भीर समस्या मान्दै टेमानीले स्थानीय स्तरमै रोजगारी सिर्जना गर्ने योजना सार्वजनिक गरेका छन् । प्राविधिक शिक्षा तथा सीप विकास केन्द्र स्थापना गरी युवालाई आत्मनिर्भर बनाउने वातावरण तयार गर्ने उनको भनाइ छ । ‘विदेशिनुपर्ने बाध्यता अन्त्य गर्न उत्पादन र उद्यमशीलता विस्तार गर्नुपर्छ,’ उनले जोड दिए ।
महिलालाई आर्थिक रूपमा सशक्त बनाउन सीप विकास विद्यालयको अवधारणा ल्याउने, महिला श्रमिकका लागि केयर सेन्टर स्थापना गर्ने तथा घरेलु उद्योग सञ्चालनका लागि सहजीकरण गर्ने योजना उनले प्रस्तुत गरेका छन् । खाद्यान्न प्रशोधन, गार्मेन्ट तथा टेलरिङजस्ता घरमै बसेर गर्न सकिने उद्यममार्फत महिलाको आम्दानी बढाउने लक्ष्य उनले राखेका छन् । शिक्षा क्षेत्र सुधारलाई प्राथमिकतामा राख्दै टेमानीले मधेश विश्वविद्यालय लाई देशकै उत्कृष्ट विश्वविद्यालयका रूपमा विकास गर्न प्रदेश सरकारसँग सहकार्य गर्ने बताएका छन् । सरकारी विद्यालयको गुणस्तर अभिवृद्धिका लागि स्थानीय तहसँग मिलेर आवश्यक पहल गर्ने उनको प्रतिबद्धता छ ।
‘ग्रेटर वीरगंज’ निर्माणको अवधारणा अघि सार्दै उनले व्यवस्थित शहरी विकासमा जोड दिएका छन् । पर्सागढी र बहुदरमाई नगरपालिकाको स्तरोन्नतिका लागि सम्बन्धित निकायसँग सहकार्य गर्ने, ग्रामीण सडक, नाला तथा अधुरा योजनालाई पूरा गर्ने र दीर्घकालीन खानेपानी समाधानका लागि विशेषज्ञ टोली परिचालन गर्ने उनको योजना छ । जिल्लाका सरकारी अस्पताललाई सुविधा सम्पन्न बनाउने, हेल्थ पोस्ट नभएका क्षेत्रमा नयाँ संरचना स्थापना गर्ने तथा सुचारु सञ्चालन सुनिश्चित गर्न स्थानीय र संघीय सरकारसँग सहकार्य गर्ने टेमानीले बताएका छन् ।
‘तपाईंको अमूल्य मत, समृद्ध पर्साको आधार’ भन्ने नारासहित चुनावी मैदानमा उत्रिएका टेमानीले जनताको विश्वास नै आफ्नो शक्ति भएको उल्लेख गरेका छन् । अब निर्वाचनको मिति नजिकिँदै जाँदा पर्सा–२ का मतदाताले विकास, रोजगारी र स्वाभिमानको एजेन्डालाई कत्तिको समर्थन गर्छन् भन्ने चासो बढेको छ ।
प्रतिक्रिया दिनुहोस् !