वीरगंज (पर्सा), ११ फागुन । वीरगंज महानगरपालिका वडा नं. ११ श्रीपुरमा भएको दुई समुदायबीचको झडपपछि पर्सा जिल्ला प्रशासन कार्यालयले जारी गरेको कर्फ्यू आदेश चौतर्फी आलोचना भएपछि हटाइएको छ । स्थानीयस्तरमा तीव्र असन्तुष्टि र सामाजिक सञ्जालमार्फत व्यापक विरोध बढेपछि जिल्ला सुरक्षा समितिको निर्णयअनुसार कर्फ्यू फिर्ता लिइएको हो । यद्यपि, शान्ति सुरक्षाको अवस्थालाई ध्यानमा राख्दै महानगरका संवेदनशील क्षेत्रमा भने निषेधाज्ञा कायमै राखिएको छ ।
आइतबार साँझ श्रीपुर क्षेत्रमा दुई समुदायबीच झडप हुँदा केही व्यक्ति घाइते भएका थिए भने प्रहरीले घटनामा संलग्न केहीलाई नियन्त्रणमा लिएर अनुसन्धान अघि बढाएको थियो । तर सोमबार बिहान ९ः४५ बजेदेखि अर्को आदेश नहुन्जेलसम्म लागू हुने गरी सम्पूर्ण बजार क्षेत्र समेटेर कर्फ्यू आदेश जारी भएपछि स्थानीय नागरिक, व्यवसायी, सामाजिक अगुवा तथा विभिन्न सरोकारवालाले कडा आलोचना गरेका थिए ।
विवाहको लगन र निर्वाचनको समय भएकाले कर्फ्यूले दैनिक जनजीवन, व्यापार व्यवसाय र आवतजावतमा प्रत्यक्ष असर पर्ने भन्दै नागरिकले प्रशासनको निर्णयप्रति असन्तुष्टि जनाएका थिए । ‘एउटा वडामा भएको घटनालाई आधार बनाएर पूरै शहर ठप्प पार्नु उचित होइन’ भन्ने धारणा सामाजिक सञ्जालमा व्यापक बनेको थियो । केही सामाजिक अगुवा र युवाहरूले प्रशासन र सुरक्षा निकायको कार्यशैलीमाथि प्रश्न उठाउँदै सुरक्षा व्यवस्थालाई सुदृढ बनाउनुपर्ने तर सम्पूर्ण शहर बन्द गर्न नहुने बताएका थिए ।
चौतर्फी दबाब र सर्वपक्षीय छलफलपछि जिल्ला प्रशासन कार्यालयले कर्फ्यू आदेश सोमबार साँझ ४ः३० बजेदेखि लागू हुने गरी हटाएको जनाएको छ । स्थानीय प्रशासन ऐन, २०२८ को दफा ६ (क) बमोजिम जारी गरिएको उक्त आदेश शान्ति सुरक्षाको अवस्था सुधार भएको मूल्याङ्कनका आधारमा फिर्ता लिइएको प्रमुख जिल्ला अधिकारीले जानकारी दिएका छन् ।
कर्फ्यू हटाइएपनि अवस्था पूर्ण रूपमा सामान्य भइनसकेको भन्दै महानगरका केही संवेदनशील क्षेत्रहरूमा भने निषेधाज्ञा जारी गरिएको छ । मिति २०८२ फागुन ११ गते साँझ ६ः०० बजेदेखि मिति १२ गते बिहान ८ः०० बजेसम्म ती क्षेत्रमा कुनै पनि प्रकारका सभा, जुलुस, प्रदर्शन, भेला तथा सामूहिक गतिविधि गर्न प्रतिबन्ध लगाइएको छ ।
प्रशासनका अनुसार बाईपास रोड, रानीघाट पुल, पावरहाउस चौक र घण्टाघर चौक आसपासका क्षेत्रलाई समेटेर निषेधाज्ञा लागू गरिएको छ । सम्बन्धित क्षेत्रको पूर्व, पश्चिम, उत्तर र दक्षिण सीमांकनभित्र पर्ने स्थानहरूमा सुरक्षा सतर्कता बढाइएको छ । आदेशको उल्लंघन गर्नेलाई नियन्त्रणमा लिई कानुन बमोजिम कारबाही गरिने प्रशासनले चेतावनी दिएको छ ।
स्थानीय प्रशासनले शान्ति सुरक्षा कायम राख्न सबै राजनीतिक दल, सामाजिक संघसंस्था, युवा समूह तथा सर्वसाधारणलाई संयमता अपनाउन आग्रह गरेको छ । प्रशासनको पछिल्लो निर्णयलाई कतिपयले परिस्थिति सम्बोधन गर्ने सकारात्मक कदमका रूपमा हेरेका छन् भने केहीले प्रारम्भिक कर्फ्यू घोषणा प्रक्रियामाथि पुनर्विचार गर्नुपर्ने मत व्यक्त गरेका छन् ।
यस घटनाले सुरक्षा संवेदनशीलता र नागरिक स्वतन्त्रताबीच सन्तुलन कायम गर्न प्रशासनलाई थप जिम्मेवार बनाएको विश्लेषकहरूको भनाइ छ । वीरगंजको व्यापारिक तथा सामाजिक गतिविधि पुनः सामान्य अवस्थामा फर्किन प्रशासन र नागरिक दुवैको समन्वय आवश्यक रहेको देखिएको छ । 
प्रतिक्रिया दिनुहोस् !