वीरगंज (पर्सा), ९ फागुन । वीरगंज महानगरपालिका–७ मा सम्पन्न एक विशेष कार्यक्रममा विभिन्न दल परित्याग गर्दै केही प्रभावशाली स्थानीय नेता नेकपा (एमाले) मा प्रवेश गरेका छन् । जनता समाजवादी पार्टी (जसपा) नेपालका स्थानीय नेता तथा वडाध्यक्षका आकांक्षी दीपक महतोले एमाले रोज्दै औपचारिक रूपमा पार्टी प्रवेश गरेका हुन् ।
महतोसँगै शिवजी गुप्ता, महिला नेतृ सुनिता देवी, नेपाली काँग्रेसका नेता सियाराम नेपाली लगायत सयौँ स्थानीय कार्यकर्ताले पनि आ–आफ्नो दल छाडेर एमालेमा आबद्धता जनाएका छन् । नवप्रवेशीहरूलाई पर्सा निर्वाचन क्षेत्र नम्बर १ बाट प्रतिनिधिसभा सदस्य पदका उम्मेदवार तथा पूर्वमन्त्री प्रदीप यादवले फूलमाला र गम्छा ओढाएर स्वागत गरे ।
कार्यक्रमलाई सम्बोधन गर्दै यादवले दीपक महतो र शिवजी गुप्ताजस्ता स्थानीय प्रभावशाली व्यक्तित्वहरूको आगमनले वडा नम्बर ७ मा एमालेको संगठनात्मक आधार थप सुदृढ भएको बताए । ‘यस प्रवेशले पार्टीलाई नयाँ ऊर्जा र बल दिएको छ,’ उनले उल्लेख गरे ।
आगामी निर्वाचनलाई ‘देश जलाउने र देश जोगाउने शक्तिबीचको प्रतिस्पर्धा’ का रूपमा चित्रित गर्दै यादवले राष्ट्रियता, संघीयता र अखण्डताको रक्षाका लागि एमालेलाई मत दिन मतदातासँग आग्रह गरे । देश अप्ठ्यारो परिस्थितिमा हुँदा खुला रूपमा राष्ट्रको पक्षमा बोल्ने पहिलो नेता एमाले अध्यक्ष केपी शर्मा ओली भएको दाबी गर्दै उनले ओलीजस्ता नेतृत्वको आवश्यकता औँल्याए । वैदेशिक हस्तक्षेप रोक्न र देशलाई स्थायित्व दिन ओली भावी प्रधानमन्त्री बन्नुपर्ने उनको भनाइ थियो ।
यादवले नेपाली काँग्रेसमाथि पनि कडा टिप्पणी गरे । काँग्रेसले आफूलाई नयाँ अनुहारका रूपमा प्रस्तुत गरे पनि पटक–पटक निर्वाचन लड्ने व्यक्तिहरूलाई टिकट दिएको भन्दै उनले आलोचना गरे । पर्सा–१ का काँग्रेस उम्मेदवार व्यवसायिक पृष्ठभूमिबाट आएको उल्लेख गर्दै उनले राजनीतिक योगदान र सामाजिक सक्रियतामाथि प्रश्न उठाए । ‘पाँच वर्ष व्यवसायमा व्यस्त रहने र चुनावका बेला मात्र मत माग्न आउने प्रवृत्ति अब स्वीकार्य हुँदैन,’ उनले भने ।
आफू यसअघि पर्सा–१ बाट निर्वाचित सांसदका रूपमा विकास निर्माण तथा परोपकारी क्षेत्रमा गरेको कामको चर्चा गर्दै यादवले मतदातालाई काम गर्ने नेतालाई रोज्न आग्रह गरे ।
यसैगरि पर्सा क्षेत्र नम्बर १ मा पर्ने वीरगंज महानगरपालिकाको वडा नम्बर २१ श्रीपुर र वडा नम्बर १२ मा शनिबार नेकपा एमालेको चुनावी घरदैलो, चुनावी कार्यालय स्थापना र पार्टी प्रवेश कार्यक्रम सम्पन्न भएको छ । वीरगंज महानगरपालिका वडा नम्बर २१ श्रीपुरमा एमाले उम्मेदवार प्रदीप यादवले चुनावी घरदैलो गरेपछि चुनावी सम्पर्क कार्यालयको उद्घाटन गरे । त्यहिअवसरमा आयोजित पार्टी प्रवेश कार्यक्रममा रेहान मन्सुरीको अगुवाईमा जालिम मियाँ, सैफ अली, इरफान मन्सुरी लगायतका जेनजी युवाहरु एमालेमा प्रवेश गरे । उनिहरुलाई एमाले उम्मेदवार यादवले अबीरटीका लगाएर पार्टीमा स्वागत गरे ।
त्यसपछि वडा नम्बर १२ मा पनि घरदैलो गरेका यादवले पार्टीको चुनावी सम्पर्क कार्यालयको उद्घाटन गरे । त्यसअवसरमा आयोजित पार्टी प्रवेश कार्यक्रममा युवा नेता मदन गुप्ताको नेतृत्वमा दर्जनौ स्थानीय युवाहरुलाई उम्मेदवार यादवले अबीरटीका लगाएर पार्टीमा प्रवेश गराएका थिए । 
प्रतिक्रिया दिनुहोस् !