वीरगंज (पर्सा), ६ फागुन । आगामी फागुन २१ गते हुने प्रतिनिधिसभा निर्वाचनलाई लक्षित गर्दै पर्सा जिल्ला क्षेत्र नं. २ मा चुनावी सरगर्मी तीव्र बन्दै गएको छ । यस क्षेत्रबाट जनता समाजवादी पार्टी (जसपा) का उम्मेदवार अशोक टेमानी यतिबेला मतदातामाझ लोकप्रिय बन्दै गएका छन् । लामो समयदेखि विकासको अपेक्षामा बसेका स्थानीय मतदाताले यस पटक नयाँ विकल्प खोजिरहेको अवस्थामा टेमानीको उम्मेदवारीले क्षेत्रबासीमा नयाँ आशा र उत्साह थपेको छ ।
क्षेत्र नं. २ मा विगतका वर्षहरूमा अपेक्षाअनुसार विकास हुन नसकेको गुनासो सर्वत्र सुनिँदै आएको छ । आधारभूत पूर्वाधार, शिक्षा, स्वास्थ्य तथा रोजगारीका क्षेत्रमा उल्लेखनीय प्रगति हुन नसकेको भन्दै मतदाताहरू निराश देखिन्थे । यही परिवेशमा उद्योगी तथा समाजसेवीको रूपमा परिचित नयाँ अनुहार अशोक टेमानी चुनावी मैदानमा उत्रिएपछि स्थानीयस्तरमा सकारात्मक चर्चा सुरु भएको छ ।
टेमानीले घरदैलो अभियानका क्रममा जनतासँग प्रत्यक्ष संवाद गर्दै उनीहरूको समस्या नजिकबाट बुझेको बताएका छन् । ‘क्षेत्रको विकास, गुणस्तरीय शिक्षा, सुलभ स्वास्थ्य सेवा र स्थानीय स्तरमै रोजगारी सिर्जना मेरो पहिलो प्राथमिकता हुनेछ,’ उनले विभिन्न चुनावी सभामा दोहोर्याउँदै आएका छन् । उनको प्रतिबद्धताप्रति युवा तथा मध्यम वर्गका मतदाताहरू विशेष आकर्षित देखिएका छन् ।
लामो समयदेखि यस क्षेत्रमा आफ्नो प्रभाव कायम राख्दै आएको नेपाली काँग्रेस यस पटक भने कमजोर देखिएको स्थानीय विश्लेषकहरूको भनाइ छ । काँग्रेसका उम्मेदवार एवं पूर्वमन्त्री अजय चौरसियालाई घरदैलो अभियानकै क्रममा मतदाताले विरोध गरेको र त्यसपछि चुनावी गतिविधि सुस्ताएको चर्चा छ । स्थानीय तहमा मतदाताहरू सधैं चुनावका बेला मात्र देखापर्ने नेताप्रति असन्तुष्ट रहेको बताइन्छ ।
मतदाताहरूका अनुसार विगतमा निर्वाचित प्रतिनिधिहरूले चुनावपछि क्षेत्रको बेवास्ता गर्दै राजधानी केन्द्रित राजनीति गरेका कारण जनविश्वास खस्किएको हो । ‘अब हामी सचेत भइसकेका छौं । चुनावको बेला मात्रै आउने नेताहरूलाई यस पटक जवाफ दिनेछौं,’ एक स्थानीय मतदाताले बताए । यस पटकको निर्वाचनमा मतदाताहरूले विगतका कमजोरी दोहोरिन नदिन सजग भएर मतदान गर्ने मनस्थिति बनाएको देखिन्छ ।
यद्यपि प्रतिस्पर्धा भने रोचक हुने संकेत देखिएको छ । जसपाका अशोक टेमानीसँगै राष्ट्रिय स्वतन्त्र पार्टी का उम्मेदवार सुशिल साह कानु, नेपाल कम्युनिष्ट पार्टी (एमाले) की उम्मेदवार रिमा यादव तथा नेपाल कम्युनिष्ट पार्टी का उम्मेदवार मनोज चौधरी चुनावी प्रतिस्पर्धामा छन् । बहुपक्षीय प्रतिस्पर्धाका कारण मत विभाजनको सम्भावना पनि उत्तिकै रहेको विश्लेषकहरू बताउँछन् ।
चुनावी अभियान तीव्र बन्दै जाँदा क्षेत्र नं. २ मा राजनीतिक माहोल दिनप्रतिदिन तातिरहेको छ । विकास र सुशासनको मुद्दा यस पटकको निर्वाचनको केन्द्रबिन्दु बनेको देखिन्छ। मतदाताहरू नयाँ सोच, नयाँ नेतृत्व र परिणाममुखी कामको अपेक्षामा छन् । अब हेर्न बाँकी छ फागुन २१ गतेको मतदानले क्षेत्र नं. २ का मतदाताहरूको यो उत्साह र परिवर्तनको चाहनालाई कस्तो परिणाम दिन्छ । चुनावी प्रतिस्पर्धा जति रोचक बन्दै गएको छ, त्यति नै मतदाताको निर्णयले आगामी राजनीतिक दिशालाई निर्धारण गर्ने निश्चित छ ।
प्रतिक्रिया दिनुहोस् !