वीरगंज (पर्सा), ६ फागुन । पर्सा निर्वाचन क्षेत्र नम्बर–१ का प्रतिनिधिसभा सदस्य पदका उम्मेदवार नेपाल कम्युनिष्ट पार्टी (एमाले) का प्रदीप यादवले वीरगंज महानगरपालिका–११ र १४ अन्तर्गत रानीघाट, श्रीपुर र बहुवरी क्षेत्रहरूमा घरदैलो कार्यक्रम सम्पन्न गरेका छन् । कार्यक्रममा उनले स्थानीय बासिन्दासँग प्रत्यक्ष संवाद गर्दै आफ्नो विगतको योगदान र आगामी क्षेत्रीय विकास योजनाहरू प्रस्तुत गरे ।
यादवले आफू क्षेत्रको हरेक कुनामा परिचित उम्मेदवार भएको उल्लेख गर्दै मतदातालाई सूर्य चिन्हमा मतदान गर्न आग्रह गरे । उनले भने, ‘१० वर्षअघि पर्सा–१ को अवस्था सम्झनुहोस् । सडक, विद्यालय, विवाह भवन, खेलमैदान, मसान घाट, मन्दिर र मस्जिदहरूको अवस्था कस्तो थियो । म निर्वाचित भएपछि भएका विकासका कामहरू तपाईंहरूले आफैं देख्न सक्नुहुन्छ ।’
उनी यस क्षेत्रमा सधैं जनताको सुख–दुःखमा साथ रहने र अन्य उम्मेदवारहरू केवल चुनावी समयमा सक्रिय हुने भएकाले मतदाताले विवेकपूर्ण निर्णय गर्नुपर्ने उल्लेख गरे । साथै, यादवले नेकपा (एमाले) को राष्ट्रियता, आर्थिक समृद्धि र समाजवादी उन्मुख विकासलाई आफ्नो व्यक्तिगत प्रतिबद्धताका रूपमा अँगालेको बताए ।
पूर्व मन्त्रीका रूपमा अनुभव भएका यादवले गरिबी निवारण, रोजगारी सिर्जना र सांस्कृतिक संरक्षणलाई आफ्नो प्राथमिकताका रूपमा अघि सारेका छन् । उनले आगामी कार्यकालमा यी एजेन्डालाई थप परिणाममुखी बनाउने र क्षेत्रीय विकासका लागि योजनाबद्ध कदम चाल्ने दाबी गरे । कार्यक्रममा नेकपा (एमाले) की केन्द्रीय सदस्य तथा निवर्तमान प्रतिनिधिसभा सदस्य निर्मला देवकोटा, पूर्व केन्द्रीय सदस्य अरविन्द सिंह, जिल्ला उपाध्यक्ष सुन्दर कुर्मी लगायतको उपस्थिति रहेको थियो । सहभागीहरूले यादवको नेतृत्व, अनुभव र क्षेत्रीय ज्ञानप्रति विश्वास व्यक्त गर्दै व्यापक समर्थन जनाए ।
यस घरदैलो कार्यक्रममा बासिन्दाले सडक, शिक्षा, स्वास्थ्य, खेलकुद पूर्वाधार तथा धार्मिक संरचनाको संरक्षण जस्ता स्थानीय मागहरू उठाएका थिए । यादवले ती समस्याहरूलाई प्राथमिकताका साथ सम्बोधन गर्ने र आगामी दिनमा निरन्तर घरदैलोमार्फत जनतासँग प्रत्यक्ष संवाद कायम राख्ने प्रतिबद्धता व्यक्त गरे ।
निर्वाचन नजिकिँदै गर्दा क्षेत्र–१ मा घरदैलो, भेटघाट र संवाद कार्यक्रमहरू तीव्र भइरहेको छ । यस कार्यक्रममा देखिएको व्यापक सहभागिता र उत्साहले यादवको क्षेत्रीय उपस्थितिलाई बलियो बनाएको विश्लेषकहरूले बताएका छन् ।
प्रतिक्रिया दिनुहोस् !