वीरगंज (पर्सा), ६ माघ । फागुन २१ गते हुने प्रतिनिधिसभा निर्वाचनलाई लक्षित गर्दै पर्सा निर्वाचन क्षेत्र नम्बर २ मा कडा र रोचक प्रतिस्पर्धा हुने संकेत देखिएको छ । यस क्षेत्रमा तीन पटक सांसद र दुई पटक मन्त्री (एक पटक सहायकमन्त्री) भइसकेका अजयकुमार चौरसिया नेपाली कांग्रेसका तर्फबाट पुनः उम्मेदवार बनेर चुनावी मैदानमा उत्रिएका छन् ।
२०७९ सालको प्रतिनिधिसभा निर्वाचनमा चौरसियाले जनता समाजवादी पार्टी (जसपा) नेपालका उम्मेदवार सुरेन्द्र कुर्मीलाई पाँच हजारभन्दा बढी मतान्तरले पराजित गर्दै सांसदमा निर्वाचित भएका थिए । तर यसपटक भने चौरसियालाई आफ्नै दलभित्रको विद्रोहले चुनौती थप्ने देखिएको छ । कांग्रेसबाट टिकटको दाबेदार रहेका पूर्व प्रदेशसभा सदस्य राजेश्वर साह तेलीले पार्टी निर्णयप्रति असन्तुष्टि जनाउँदै स्वतन्त्र उम्मेदवारी दिएका छन् । अन्तिम समयसम्म टिकटका लागि अडान राखेका तेलीले पार्टीले चौरसियालाई उम्मेदवार बनाएपछि स्वतन्त्र रूपमा मैदानमा उत्रिने निर्णय गरेका हुन् ।
यस्तै राष्ट्रिय स्वतन्त्र पार्टी (रास्वपा) बाट युवा नेता सुशील कुमार कानु पनि पर्सा–२ बाट चुनावी प्रतिस्पर्धामा उत्रिएका छन् । वीरगंज महानगरपालिका वडा नम्बर १० का वडाध्यक्ष पदबाट राजीनामा दिएर उम्मेदवारी दिएका कानु युवामाझ लोकप्रिय मानिन्छन् । वैकल्पिक राजनीतिक शक्तिका रूपमा उदाएको रास्वपाको देशव्यापी लहरको फाइदा कानुले पाउने आकलन गरिएको छ, जसले गर्दा युवाहरुको मत उनीतर्फ आकर्षित हुने अनुमान गरिएको छ ।
पर्सा–२ बाट नेकपा एमालेकी जेन–जी पुस्ताकी उम्मेदवार रिमा यादव, जसपा नेपालबाट उद्योगपति अशोक टेमानी, नेपाली कम्युनिष्ट पार्टीबाट मनोज चौधरी, राष्ट्रिय प्रजातन्त्र पार्टीबाट पूर्व सांसद विना जैसवाल कुर्मी लगायत विभिन्न दल तथा स्वतन्त्र गरी कुल ३२ जना उम्मेदवार चुनावी मैदानमा रहेका छन् । यसले पर्सा–२ को निर्वाचनलाई अझ प्रतिस्पर्धात्मक र चासोपूर्ण बनाएको छ ।
प्रतिक्रिया दिनुहोस् !