वीरगंज (पर्सा), ४ पुस । पर्साको जगरनाथपुर गाउँपालिकामा पालिका स्तरीय चौथो राष्ट्रपति रनिङ शिल्ड प्रतियोगिता शुक्रबारदेखि सुरु भएको छ । गाउँपालिका वडा नं. ५ स्थित मधुवाहा खेलमैदानमा आयोजित प्रतियोगिताको उद्घाटन गाउँपालिका अध्यक्ष श्रीकान्त प्रसाद यादवले औपचारिक रूपमा गर्दै खेलकुद उत्सवको शुभारम्भ गरेका हुन् ।
उद्घाटन समारोहलाई सम्बोधन गर्दै अध्यक्ष यादवले जगरनाथपुर गाउँपालिकाका सबै छ वटै वडाबाट सहभागी विद्यालयहरूबीच सञ्चालन भइरहेको प्रतियोगिताले विद्यार्थीहरूमा खेलकुद भावना, अनुशासन, आत्मविश्वास र स्वस्थ जीवनशैलीको विकासमा महत्वपूर्ण योगदान पुर्याउने विश्वास व्यक्त गरे । उनले खेलकुदलाई केवल प्रतिस्पर्धाको माध्यमका रूपमा मात्र नभई राष्ट्र निर्माणका लागि सक्षम, अनुशासित र ऊर्जावान युवा उत्पादन गर्ने प्रभावकारी आधारको रूपमा लिनुपर्नेमा जोड दिए । साथै, आगामी दिनहरूमा पनि विद्यालयस्तरीय खेलकुद गतिविधिको प्रवद्र्धन र विकासका लागि गाउँपालिका निरन्तर प्रतिबद्ध रहने उनको भनाइ थियो ।
वडा नं. ५ का वडाध्यक्ष बिहारी महतो नूनियाको अध्यक्षतामा सम्पन्न उद्घाटन कार्यक्रममा गाउँपालिकाकी उपाध्यक्ष बबिता सिंह क्षेत्री, प्रमुख प्रशासकीय अधिकृत सन्देश कुमार यादव, शिक्षा अधिकृत अशोक सिंह तथा माध्यमिक विद्यालय संठीका प्रधानाध्यापक रामाधेश चौहानले प्रतियोगिताको सफलताको कामना गर्दै शुभकामना मन्तव्य व्यक्त गरेका थिए । कार्यक्रमको सञ्चालन शिक्षक रुपनारायण साहले गरेका थिए ।
आयोजकका अनुसार प्रतियोगितामा गाउँपालिका भित्रका दुई दर्जनभन्दा बढी सामुदायिक विद्यालयहरूको सहभागिता रहेको छ । प्रतियोगिता अन्तर्गत १०० मिटर र २०० मिटर दौड (छात्र/छात्रा), हाई जम्प, लङ जम्प (छात्र/छात्रा), शटपुट, ज्याभलिन थ्रो (छात्र/छात्रा) लगायतका विभिन्न खेलकुद विधाहरू सञ्चालन हुनेछन् ।
यस प्रतियोगिताले विद्यालयस्तरका विद्यार्थीहरूलाई आफ्नो प्रतिभा प्रदर्शन गर्ने अवसर प्रदान गर्नुका साथै खेलकुदमार्फत आपसी सद्भाव, सहकार्य र प्रतिस्पर्धात्मक क्षमताको विकासमा टेवा पुग्ने अपेक्षा गरिएको छ । 
प्रतिक्रिया दिनुहोस् !