वीरगंज (पर्सा), ११ जेठ । छिमेकी मुलुक भारतको विहार राज्यमा शनिबार छैटौँ चरणको निर्वाचन अन्तर्गत आठ निर्वाचन क्षेत्रमा लोकसभा निर्वाचन हुँदैछ । भारतसँग जोडिएका नेपालको सीमावर्ती जिल्लामा पेसा तथा रोजगारी गर्दै आइरहेका भारतको विहार राज्यका स्थायी नागरिक धमाधम स्वदेश फर्किरहेका छन् । पर्सा तथा बारा जिल्लामा पेसा तथा रोजगारीको सिलसिलामा आएका भारतीय नागरिक आफ्ना जनप्रतिनिधिलाई भोट हाल्नका लागि दैनिक हजारौँको सङ्ख्यामा आफ्नो मुलुक फर्किरहेका दृश्य देख्न सकिन्छ । बिहीबारदेखि दुवै मुलुकले बिहान ६ बजेदेखि निर्वाचनका कारणले सीमानाका बन्द गर्ने निणर्य गरेका छन् । भारतीय नागरिक भने बिहीबार र शुक्रबार ठूलो सङ्ख्यामा नेपालको सीमा क्षेत्रबाट पैदलयात्रा तय गरेर नै आफ्नो मुलुकतर्फ फर्किरहेका छन् ।
भारतमा हुने लोकसभा निर्वाचनलाई लक्षित गर्दै भारतसँग सीमा जोडिएको वीरगंज भन्सार कार्यालय सहितका पर्सा जिल्लाका सीमानाका भने बिहीबार बिहान ६ बजेदेखि बन्द भएका हुन । अहिले दुवै मुलुकको सीमा क्षेत्रमा सवारीसाधन भने चलेका छैनन् । भारतीय नागरिक नेपालको सीमा क्षेत्रबाट पैदल यात्रा गरेर भारतीय भूमिमा प्रवेश गरिरहेका छन् । भारतीय भूमिमा भने नियमितरुपमा रेल तथा अन्य सवारीसाधन सञ्चालनमा आइरहेका छन् । विहारको बेतियामा स्थायी घर भई हाल आरएमडी रिसर्च इन्स्टिच्यूट रोड हिमालय जीतपुर बारामा कार्यरत विनाशङ्कर सिंहले पनि आफ्नो मुलुकमा लोकसभाको निर्वाचनका लागि भोट हाल्न जान लागेको बताए । 
‘निर्वाचन यो लोकतन्त्रको महान् पर्व हो, त्यसमा आफ्नो अधिकारको सदुपयोग गर्नका लागि निर्वाचनमा भोट हाल्न आफ्नो निर्वाचन क्षेत्रमा जाँदैछु’, उनले भने, ‘निर्वाचनले सार्थक उम्मेदवार र सही प्रतिनिधि छनोट गर्ने आधार भएकाले पनि भोट हाल्न सधैँजसो जाने गरेको छु ।’ उनले निर्वाचनमा योग्य र सक्षम उम्मेदवारलाई भोट हाल्ने बताए । उनी मात्रै होइन हजारौँ सङ्ख्यामा भारतीय नागरिक आफ्नो मुलुकमा भोट हाल्न गइरहेको दृश्य देख्न सकिन्छ । बाराको जगदम्बा स्टिलमा तीन वर्षदेखि कार्यरत विहार राज्यको मोतिहारी जिल्ला नखौलाका वडा नं २ का मोदकुमारले पनि निर्वाचनका लागि आफ्नो घर जान लागेको बताए । “भोलि (शनिबार) लोकसभाको निर्वाचन हुँदैछ आफ्नो मनपर्ने जनप्रतिनिधिलाई भोट हाल्नका लागि जादैँछु”, उनले भने, ‘हरेक निर्वाचनमा भोट हाल्नका लागि जाने गरेको छु ।’ उनको निर्वाचन क्षेत्र पश्चिम चम्पारण रहेको छ ।
वीरगंजको घण्टाघर नजिकै राधेमाईमा मेडिकल सञ्चालन गर्दै आएका रिपु तिवारीले पनि विहारको पश्चिम चम्पारण नरकट्टियागञ्जमा भोट हाल्न जान लागेको बताए । ‘आफ्नो प्रतिनिधि छान्नका लागि जान लागेको छु, अहिले मेडिकल बन्द गरेर जान लागेको हो’, उनले भने, ‘निर्वाचन लोकतन्त्रको ठूलो उत्सव भएकाले पनि आफ्नो सही प्रतिनिधि छान्नका लागि यो जतिको उपयुक्त माध्यम अरु छैन ।’ विहार राज्यमा लोकसभा निर्वाचनका ४० निर्वाचन क्षेत्र रहेका छन् । तीमध्ये अहिले छैटौँ चरणको निर्वाचन हुन लागेको हो । जेठ १२ गते विहार राज्यका आठ निर्वाचन क्षेत्रमा निर्वाचन हुँदैछ । वाल्मीकि नगर, पश्चिम चम्पारण, पूर्वी चम्पारण, शेओहार, वैशाली, गोपालगञ्ज, सिवान, महाराजगञ्जमा निर्वाचन हुँदैछ । निर्वाचनको मतपरिणाम भने जुन ४ तारिखमा घोषणा गर्ने बताइएको छ । पर्सा जिल्लामा एक सय सात किमी सीमा क्षेत्र भारतसँग जोडिएको छ । रासस 
प्रतिक्रिया दिनुहोस् !