वीरगंज (पर्सा), ९ माघ । नेशनल ईन्फोटेक (एनआई) क्रिकेट कपमा नेशनल एकेडेमीलाई पराजित गर्दै वीरगञ्ज पब्लिक कलेज (बिपिसी) सेमीफाइनलमा प्रवेश गरेको छ । सोमवार सम्पन्न खेलमा नेशनल एकेडेमीलाई ६९ रनको फराकिलो अन्तरले पराजित गर्दै बिपिसीले सेमीफाइनलमा स्थान बनाएको हो ।
टस जितेर ब्याटिङ् गरेको बिपिसीले १९.५ ओभरमा सबै विकेट गुमाएर १३९ रनको योगफल तयार पारेको थियो । जसका लागि अफ्जल अन्सारीले २५ रन बनाए । जडुबन्शी बैठाले २३ रन जोड्दा सक्षम खड्काले १९ रन बनाए । नेशनल एकेडेमीका शनि कुमार कलवारले ३.५ ओभरमा २३ रन दिएर ४ विकेट लिए । बिरेन्द्र साह कानुले ४ ओभरमा २१ रन दिएर ३ विकेट लिए । १४० रनको लक्ष्य पछ्याउन ब्याटिङ्मा उत्रिएको नेशनल एकेडेमी ७० रनमै समेटियो ।
नेशनल एकेडेमीले १३.२ ओभरमै सबै बिकेट गुमायो । बिपिसीका राहुल बैठा, बाल्मिकी राउत र अफ्सर अन्सारीले समान २/२ विकेट लिए । प्रतियोगीतामा जडुबन्शी बैठा प्लेयर अफ दी म्याच घोषित भएका छन् । उनलाई नेपालका राष्ट्रिय खेलाडनी हासिम अन्सारीले पुरस्कार प्रदान गरेका थिए । आजदेखि लिग चरणका खेलहरु सकिएका छन् । बिपिसीसँगै नेशनल ईन्फोटेक, हेटौडा स्कुल, र ग्लोबल बिजनेस कलेजले सेमीफाइनमा स्थान बनाएका हुन्।
क्रिकेट संघ पर्साका अध्यक्ष एवम् एनआई कलेजका प्रबन्ध निर्देशक मनिष सिंहका अनुसार यही बुधवार र बिहिवार सेमीफाइनल खेलहरु खेलाइनेछ । बुधवार ११ बजेदेखि हुने पहिलो सेमीफाइनल खेलमा नेशनल ईन्फोटेक र हेटौडा स्कुलबीच प्रतिस्पर्धा हुनेछ भन् बिहिवार बिपिसी र ग्लोबल बिजनेस कलेजबीच प्रतिस्पर्धा हुने सिंहले बताए । एनआई र ग्लोबल समूह ‘ए’ बाट शीर्ष स्थानमा रहँदै सेमीफाइनलमा पुगेका हुन् भने हेटौडा र बिपिसी समूह ‘बी’ का शीर्ष स्थानका टोली हुन् ।
सेमीफाइनलबाट विजयी हुने टोलीबीच शनिवार फाइनल खेल हुने सिंहले जानकारी दिए । पुष २७ गतेदेखि वीरगञ्जको नारायणी क्रिकेट रंगशालामा सुरु भएको एनआई क्रिकेट कपको फाइनल यही शनिवार माघ १३ गते हुनेछ । प्रतियोगीतामा १० वटा स्कुल तथा कलेजले सहभागिता जनाएका थिए । 
प्रतिक्रिया दिनुहोस् !