चन्द्रपुर (रौतहट), २६ पुस । सरकारले सामुदायिक विद्यालयका लागि भन्दै मोटो रकम छुट्याउने गरेको छ । तर पनि शैक्षिक गुणस्तरमा कमजोर रहेको गुनासो भइरहँदा रौतहटका सामुदायिक विद्यालयहरुको भवनहरुसमेत दुरावस्थाका छन् । जसले गर्दा यहाँका बालबालिकाहरु कठ्याङ्ग्रिदो चिसो मौसममा समेत चिसो भुइँमै पढ्न बाध्य छन् भने कक्षा कोठा अभावमा एउटै कक्षामा बहु कक्षा सञ्चालन गर्नुपर्ने बाध्यता छ ।
रौतहटको चन्द्रपुर नगरपालिका १० श्रीनगर खोरमा रहेको सरस्वती प्राथामिक विद्यालय, जहाँ पुस माघको कठ्याङ्ग्रिदो चिसो मौसममा फुसको छानाे, फुसकै बार रहेको कक्षा कोठामा बस्छन् विद्यार्थी । बस्ने डेस्क-बेन्च समेत नहुँदा बालबालिकाहरु चिसो मौसम पनि चिसो भुइँमा बसेर पढिरहेका छन् ।
गत वर्षको सरस्वती पूजादेखि यो विद्यालय नियमित सञ्चालनमा आयो । कक्षा ३ सम्मको पठनपाठन हुँदै आएको यो विद्यालयमा अहिलेसम्म भौतिक संरचना निर्माण हुन सकेका छैन् । फुसको टहरामा बालबालिकालाई भुइँमै राखेर अध्यापन गरिँदै आएको छ । अधिकांश दलित तथा विपन्न समुदायका बालिबालिकाले अध्ययन गर्ने यो विद्यालयमा कक्षा कोठासमेत छैन । मात्र एक कोठे पक्की भवन विद्यार्थीको प्रयोजनका लागि छैन । यसका शिक्षकहरुले कार्यालय सञ्चालन र भान्छाका प्रयोग गर्दै आएका छन् ।
टायलले छाएको एउटै कोठामा बहु कक्षा सञ्चालन छ । कक्षा १ र २ का बालबालिकालाई एउटै कोठामा राखेर पठनपाठन गरिँदै आएको छ । कक्षाकोठा अभावमा बहुकक्षा विधिबाट पढाउनु पर्दा विद्यार्थीहरुको सिकाइ कार्य प्रभावकारी हुन सकेको छैन । जाडोको समय, तराईमा शितलहर पनि शुरु भइसकेको छ । घाम लागेको बेलामा खुला चौरमा राखेर पढाइने गरे पनि अहिले त्यो अवस्था पनि छैन । वर्षाको समयमा विद्यालयको अवस्था भनिसाध्य छैन । विद्यालयको यस्तो अवस्था हुँदा पनि स्थानीय सरकारले समेत कुनै चासो देखाएको छैन ।
३ कक्षा सम्म सञ्चालन हुँदै आइरहेको सो विद्यालयले एक शिक्षकको पनि दरबन्दी पाएको छैन । शिक्षक दरबन्दीसमेत नहुँदा चन्द्रपुर नगरपालिकाले २ जना शिक्षकहरुलाई डोर हाजिरीमा पढाउन खटाएको छ । नगरपालिकाले वाडालाई वाइपास गरेर आफूखुशी विद्यालय सञ्चालन गरेको स्थानीय जनप्रतिनिधिको गुनासो छ । २ कठ्ठा ५ धुर जग्गा मात्रै रहेको यो विद्यालयमा एउटा शौचालय र एउटा ट्युवेल जडान गरिएको छ । बालबालिकालाई पढाउन ह्वाइट बोर्डसमेत छैन । अब छिट्टै नै सुविधा सम्पन्न विद्यालय भवन निर्माण गर्ने योजना रहेको नगरप्रमुख बताउँछन् ।
कतिपय सामुदायिक विद्यालयले विद्यार्थीसमेत नपाउने अवस्था भइरहँदा ३ कक्षा सम्म सञ्चालन रहेको यो विद्यालयमा भने १ सय ४० जना विद्यार्थी बालबालिका छन् । चन्द्रपुर नगरपालिका स्मार्ट सिटी बन्ने दौडमा लागिरहँदा विद्यालय शिक्षा सुधारमा कसरी अघि बढ्छ, प्रतिक्षाको विषय बनेको छ । 
प्रतिक्रिया दिनुहोस् !