बारा प्रहरीलाई चुनौति दिदै कलैया बजारमा दिनदहाडै गोली हानी युवकको हत्या

कलैया (बारा), १३ कात्तिक । बारा प्रहरीलाई कडा चुनौति दिदै सदरमुकाम कलैयामा दिनदहाडै गोली प्रहार गरि युवकको हत्या गरिएको छ । कलैया उपमहानगरपालिका वडा नं. ६ मदरसा टोल स्थित सोमबार दिउँसो करिब १ बजेको समयमा बाल एकता बोर्डिङ्ग स्कुलका संचालक एवं प्रधानाध्यापक ३५ वर्षीय गुड्डु भनिने रुपेश सर्राफलाई अज्ञात समूहले गोली हानी हत्या गरेको हो ।

बारा जिल्लाको सदरमुकाम कलैयाको मुख्यबजारमै उनीलाई मोटर साइकलमा आएका दुई जना अज्ञात व्यक्तिले तीन राउण्ड गोली हानेका थिए । गोली लागेर घाइते भएका सर्राफलाई कलैया प्रादेशिक अस्पताल लगिएको थियो । त्यहाँ उपचार हुन नसकेपछि अहिले वीरगंज स्थित वयोधा अस्पतालमा लगिएको थियो भने बयोधा अस्पतालले उनलाई मृत घोषणा गरेको थियो ।

ना. ५३ प. ९१२८ नम्बरको २२० सिसिको प्लसर मोटरसाइकलमा सवार भई अन्नपूर्ण स्वीट्सबाट मिठाई किनेर विद्यालय फर्किने क्रममा नम्बर नखुलेको दुईवटा मोटरसाइकलमा सवार भई आएका चारजना अज्ञात समुहले सर्राफको टाउको र छातीमा तीन राउण्ड गोली प्रहार गरि फरार भएका थिए । कलैया स्थित एन.आई.सि. एसिया बैंकको दक्षिणतर्फ मदर्शा टोल जाने बाटोमा उनीमाथि गोली प्रहार भएको हो ।

कालो सर्ट, जिन्स पाईन्ट लगाएको र मुखमा रुमाल बान्धेको मानिसहरुले गोलि प्रहार गरि फरार भएको प्रहरीले जनाएको छ । यो घटनाले कलैयाको सुरक्षा व्यवस्थालाई चुनौति थपेको छ । दिन दहाडै हतियार सहित हिँडेका अज्ञात व्यक्तिले प्रधानाध्यापक सर्राफलाई गोली हानेकोले कलैयाको सुरक्षा व्यवस्थाप फित्तलो भएको स्थानीयहरुले महसुस गर्न थालेका छन् । यस घटनाबारे बारा प्रहरीले कुनै आधिकारिक जवाफ दिएको छैन ।