आगामी निर्वाचनमा जसपाको साथ पाउनेमा एमाले उम्मेदवारहरुको आशंका

• मुस्कान श्रेष्ठ
वीरगंज (पर्सा), ३० असोज / नेकपा एमाले पर्सा क्षेत्र नम्बर ३ का प्रतिनिधि सभाका उम्मेदवार राज कुमार गुप्ताले जसपासंग गठबन्धनको कुनै भर नभएको बताउनु भएको छ । आगामी प्रतिनिधि तथा प्रदेश सभा निर्वाचन लक्षित एमाले उम्मेदवारसंग प्रेस चौतारी विषयक अन्तरक्रिया कार्यक्रममा नेता गुप्ताले सो कुरा बताउनुभएको हो । उहाँले पार्टीले जसपासंग गठबन्धन गरेर चुनावमा होमिए पनि गठबन्धनबाट साथ नपाएको गुनासो गर्नुभयो । उहाँले घरदैलो कार्यक्रममा जसपाका उम्मेदवार बाहेक अन्य कुनै कार्यकर्ताको उपस्थिति नरहेको भन्दै यो गठबन्धनको औचित्य माथि नै प्रश्न गर्नुभयो ।
एमालेबाट उम्मेदवार बनेका नेताहरुको क्षेत्रमा जसपाबाट ३–३ जना नेताहरु स्वतन्त्र रुपमा उम्मेदवारी दिएको विषय गम्भीर रहेको भन्दै एमालेका जिम्मेवार नेताले गठबन्धनका नेताहरुसंग छलफल गरि बागी उम्मेदवारीलाई निष्कृय बनाउन आग्रह गर्नुभयो । यस्तै एमालेका जिल्ला इन्चार्ज प्रभु हजराले जसपा नेपालका अध्यक्ष उपेन्द्र यादवकै आग्रहमा एमालेले गठबनधन गरेको बताउनुभयो । उहाँले स्थानीय तहको चुनावमा जसपासंगै आफूहरुको प्रतिस्पर्धा रहेको तर वर्तमान अवस्थामा त्यही पार्टीसंग चुनावी तालमेल रहेको बताउदै वार्ताको माध्यमबाट समस्याको समाधा गर्ने बताउनुभयो । उहाँले एमाले अधयक्ष केपी ओली नेतृत्वको सरकारको पालामा जनताको चाहना अनुसार मुलुकमा विकासका विविध कार्यहरु भएको तर ५ दलीय सत्ता गठबन्धन सरकार आएपछि जनतामा केवल निराशा मात्रै छाएको बताउनुभयो ।
प्रेस चौतारी पर्साका अध्यक्ष श्याम बंजाराको अध्यक्षतामा सम्पन्न भएको कार्यक्रममा नेकपा एमालेको तर्फबाट पर्सा क्षेत्र नम्बर १ क का उम्मेदवार बिचारी यादब, २ को ख बाट हरेराम पटेल, ३ को क बाट मंजुर अंसारी, क्षेत्र नम्बर ४ का प्रतिनधि सभा सदस्यका उम्मेदवार जालिम मियाँ, ४ क का उम्मेदवार जय प्रकाश थारु, नेता सुन्दर कुर्मी, शिव पटेल, नेपाल पत्रकार महासंघका केन्द्रिय सदस्य के.सी लामिछाने लगायत प्रेस चौतारीमा आबद्ध पत्रकारहरुको उपस्थिति रहेको थियो ।