• मुस्कान श्रेष्ठ
वीरगंज (पर्सा), १० असोज / सोमबार विहान परेको चट्याङ लागेर पर्सामा एक जना बालकको मृत्यु भएको छ भने तीन जना घाइते भएका छन् ।
विहान अन्दाजी ६ः३० बजेको समयमा मेघ गर्जन सहितको चट्याङ लाग्दा वीरगंज महानगरपालिकाका एक जना बालकको मृत्यु भएको छ भने एक महिला, एक बालक तथा एक युवक गरि तीनजना घाइते भएका छन् । मृत्यु हुनेमा वीरगंज महानगरपालिका वडा नं. २ छपकैया निवासी रामप्रसाद उपाध्यायको १५ वर्षीय छोरा सिद्धान्त उपाध्यायको मृत्यु भएको छ भने सोही ठाउँ बस्ने साविर हुसेनकी २९ वर्षीय श्रीमती कुलनेसा खातुन, वडा नं. ४ बस्ने भिखारी राउतको १३ वर्षीय छोरा अर्जुन राउत तथा पर्सा जिल्ला विन्दवासिनी गाउँपालिका वडा नं. ४ अमरपट्टिका २६ वर्षीय कुन्दन दास घाइते भएका छन् ।
वीरगंज महानगरपालिका वडा नं. २ ईदगाह चोक स्थित छठिमाई पोखरीको नजिक चट्याङ लाग्दा तीनजना घाइते भएका थिए । तिनैजनालाई तत्काल सो ठाउँमा पुगेको प्रहरीले उपचारका लागि नारायणी अस्पतालमा पु¥याउँदा अस्पतालले सिद्दान्तलाई मृत घोषित गरेको थियो भने कुलनेसा खातुन तथा अर्जुन राउतको उपचार भइरहेको छ । मृतक सिद्दान्तको शव जाँच प्रकृति मुचुक्काको कार्य सम्पन्न गरि थप अनुसन्धान भइरहेको छ भेन घाइते मध्ये अर्जुन राउतको अवस्था गम्भिर भएपछि थप उपचारको लागि नेशनल मेडिकल कलेजमा रेफर गरिएको जिल्ला प्रहरी कार्यालय पर्साका प्रहरी नायब उपरीक्षक दिपक गिरीले जानकारी दिए ।
यसैगरि विन्दवासिनी गाउँपालिका स्थित अमरपट्टि स्थित चट्याङ लागि घाइते भएका २६ वर्षीय कुन्दन दासको नारायणी अस्पतालमा उपचार भइरहेको छ । शौचालय जाने क्रममा चट्याङ लागि घाइते भएका दासलाई तत्काल प्रहरी चौकी अमरपट्टिबाट खटिएको प्रहरी टोलीले उपचारको लागि नारायणी अस्पतालमा पु¥याएको जिल्ला प्रहरी कार्यालय पर्साले जनाएको छ ।
प्रतिक्रिया दिनुहोस् !