वीरगंज (पर्सा), ६ असोज / राष्ट्रपतिले नागरिकता विद्येयक प्रमाणीकरण नगरेको भन्दै जनता समाजवादी पार्टीले वीरगंजमा विरोध प्रदर्शन गरेको छ । जसपाले बुधबार वीरगंजको आदर्शनगर स्थित मुख्य सडकमै टायर बालेर राष्ट्रपति विरुद्ध नाराबाजी गर्दै विरोध प्रदर्शन गरेको हो ।
जसपाका युवा विधार्थीहरुले राष्ट्रपति विरुद्ध नाराबाजी गर्दै उनको राजीनामा पनि मागेका छन् । प्रदर्शनका क्रममा उनीहरुले राष्ट्रपति भण्डारी मुर्दावाद, राष्ट्रपति भण्डारी राजीनामा देऊ, शीतल निवास खाली गर, लाखौं युवालाई नागरिकताविहीन बनाउन पाइँदैन लगायतका नारा लगाएका थिए ।
विरोध प्रदर्शनको क्रममा जसपा निकट समाजवादी विधार्थी युनियन पर्साका अध्यक्ष एजाजबाबु राँकीले नागरिकता विद्येयक प्रमाणीकर नगर्ने राष्ट्रपति भण्डारीको कदम संविधान माथिकै प्रहार भएको बताए । संविधान नै नमान्ने राष्ट्रपति यो देशलाई चाहिएको छैन, त्यसैले राष्ट्रपतिले छिट्टै राजीनामा दिनु पर्छ होइन भने देशभर आन्दोलनमा उत्रिने चेतावनी समेत दिए ।
त्यसैगरि प्रदर्शनमा सहभागी जसपाका जिल्ला सचिव तबरेज अहमदले संविधानको रक्षक राष्ट्रपतिले नै संविधानको ठाडो उल्लंघन गरेकाले उनको राजीनामाको माग गर्दै प्रदर्शन गरिएको बताए ।
उनले कुनै पनि विधेयक दुवै सदनबाट पारित गरी दोश्रो पटक राष्ट्रपतिकोमा पठाएपछि राष्ट्रपतिले १५ दिन भित्रमा प्रमाणीकरण गर्नु पर्ने प्रावधान संविधानमै उल्लेख रहेको बताए । तर राष्ट्रपति भण्डारीले एमाले पार्टीको कार्यकर्ता बनेर नागरिकता विद्येयक प्रमाणीकरण नगरेको उनको आरोप छ । राष्ट्रपतिले तत्कालै राजीनामा दिइनन् भने अझ सशक्त आन्दोलनमा उत्रिने चेतावनी समेत दिए ।
संसदको दुवै सदनबाट दोश्रोपटक पास भइ राष्ट्रपतिकोमा पठाइएको नागरिकता विद्येयक राष्ट्रपतिबाट प्रमाणीकरण गर्नु पर्ने अन्तिम समय मंगलबार राति १२ बजेसम्म थियो । तर राष्ट्रपति भण्डारीले उक्त विधेयक प्रमाणीकरण नगरेपछि जसपाका युवा विधार्थी नेताहरुले राष्ट्रपति भण्डारीको विरोधमा वीरगन्जमा सडकमै टायर बालेर प्रदर्शन गरेका हुन् ।
प्रदर्शनमा जसपाकी नेतृ एंव प्रदेशसभा सदस्यहरु करिमा बेगम र भीमा यादव, जसपाका नगर अध्यक्ष इश्वरचन्द्र यादव, जिल्ला समन्वय समिति पर्साका पूर्वप्रमुख नेक महम्मद अन्सारी, युवा नेता मुकेश द्विवेदी लगायतको सहभागिता थियो ।
प्रतिक्रिया दिनुहोस् !