• हरिशंकर शर्मा
वीरगंज (पर्सा), ३ असोज / असोज ३ गते सरकारले संविधान दिवस मनाई रहँदा लोकतान्त्रिक समाजवादी पार्टी नेपालले आज कालो दिनको रुपमा मनाएको छ । लोसपाले असोज ३ गतेलाई प्रतिगामी संविधानको विरुद्ध कालो दिनको रुपमा मनाएको हो । ‘असोज ३ गते’ मुर्दावादको नारा लगाउँदै पार्टीका कार्यकर्ताहरुले वीरगंजको घण्टाघर स्थित विरोध प्रदर्शन गरेका थिए ।
विरोध प्रदर्शन कार्यक्रमलाई सम्बोधन गर्दै लोकतान्त्रिक समाजवादी पार्टीका नेता सशिकपुर मियाँले मधेशी छोराहरुको छातीमा गोली हानी मधेशीहरुकै अधिकार बञ्चित गरिएको संविधान आफूहरुलाई मान्य नहुने बताए । मधेशी जनताहरुको दबाबकै कारण संविधान सभाको निर्वाचन भएको तर देशमा बहुमत रही प्रजातन्त्रको खोल ओढेका पार्टी नेपाली काँग्रेस, माओवादी तथा एमालेकै कारण मधेशी, थारु, आदिवासी, जनजाति, मुस्लिमहरुलाई अधिकारबाट बञ्चित गरिएको आरोप समेत लगाए ।
मधेशी, थारु, पीडित, शोसित, जनजाति, आदिवासी, महिलाको अधिकारबाट बञ्चित गरिएको संविधान आफूहरुलाई मान्य नहुने भन्दै संविधान जारी गरिएको दिनलाई शुरुदेखि नै कालो दिनको रुपमा मनाउँदै आएको बताए । संविधान जारी गर्ने दिन मधेशी जनताहरु आफ्नो हक अधिकारको माग गर्दै आन्दोलनमा रहेको अवस्थामा बुहमतवादी एवं प्रजातन्त्रको खोल ओढेका ढोँगी पार्टीहरु बहुमतको आडमा जबरजस्ती संधिवान लादेकोले यो संविधान जबसम्म रहन्छ तबसम्म लोकतान्त्रिक समाजवादी पार्टीले आजको दिनलाई कालो दिनकै रुपमा मनाउने उनको भनाई छ ।
आजको दिन केही मधेशवादी दलहरुले संविधान दिवस मनाउने ढोङ्ग गरि रहेको भन्दै देशमा ५ दलीय गठबन्धनको सरकार चलि रहेको छ, तर न कसैको मन मिलेको छ, न त कसैको विचार ? यो देशलाई बन्धक बनाउन विभिन्न प्रपञ्च भइरहेकोले जबसम्म संविधान संशोधन नभई सम्पूर्णको अधिकार सुनिश्चित नगरे मधेशी छोराहरुको छातिमाथि गोली प्रहार गरि जारी गरिएको संविधान आफूहरुलाई मान्य नहुने बताए ।
विरोध कार्यक्रममा लोसपाका नेता फिरोज अब्दुल लगायतले सम्बोधन गरेका थिए । संविधानलाई लोसपाले स्वीकार गरेपनि संशोधन गर्नुपर्ने माग गर्दै संविधान जारी भएको २०७२ साल देखिनै विरोधका कार्यक्रमहरु गर्दै आएको छ । संविधान जारी हुँदा तत्कालीन सरकारले दीपावली मनाउने घोषणा गरेको दिन संविधान जलाएर विरोध गरेको थियो । २०७२ साल देखि निरन्तर संविधान संशोधन, नागरिकता लगायतका मुद्दालाई लिएर आन्दोलन गरिरहेका लोसपाले माग सम्बोधन गराउन तत्कालीन केपी शर्मा ओलीको नेतृत्वमा १८ दिनका लागि मन्त्रिमण्डलमा समेत सहभागी भएको थियो ।
प्रतिक्रिया दिनुहोस् !