भरपेट भोजनालयको प्रथम स्थापना वर्ष, जनमुखी कार्यहरुको प्रोत्साहन आजको आवश्यक्ता : रुङ्गटा

• हरिशंकर शर्मा
वीरगंज (पर्सा), १८ भदौ / संविधानसभा सदस्य अनिल रुङ्गटाले भरपेट जस्ता जनमुखी कार्यहरुको प्रोत्साहन आजको प्रमुख आवश्यक्ता रहेको बताएका छन् । प्रथम स्थापना वर्षको अवसरमा भरपेट भोजनालयद्वारा आयोजित कार्यक्रमलाई सम्बोधन गर्दै प्रमुख अतिथि संविधानसभा सदस्य रुङ्गटाले यस भोजनालयबाट न्यून स्तरका समुदायले प्रत्यक्ष लाभ लिएको चर्चा गर्दै यस्तो पुनित कार्यमा सबैको साझा सहकार्यको आवश्यकता रहेको बताए ।
नेपाली कांग्रेसका युवा नेता एवं सामुदायिक संस्था सानो पाइलाका संस्थापक कञ्चन झाले सुखी सानो पाइलाले वीरगंजमा संचालन गरिरहेको भरपेट भोजनालय नमूना परियोजनाका रूपमा बधाई दिँदै प्रगतिको कामना गरेका थिए । भोजनालयका परिकल्पनाकार समेत रहेका नेता झाले भरपेट भोजनालयका निरन्तरता र विस्तारका लागि योगदान गरि ।हृका सबै सहयोगी मनहरूप्रति कृतज्ञता व्यक्त गरेका थिए ।
भोजनालयमा नियमित भोजन गरिरहेका रिक्सा चालक अक्षयलाल महतोको सभापतित्वमा भएको कार्यक्रममा वीरगंज महानगरपालिकाका उपमेयर इम्तियाज आलम, वीरगंज उद्योग वाणिज्य संघका वरिष्ठ उपाध्यक्ष अनिल कुमार अग्रवाल, नेपाली कांग्रेसका नेता प्रकाश उपाध्याय, लोसपाका युवा नेता ओमप्रकाश सर्राफ, भरपेट भोजनालयका नियमित ग्राहक श्रवण व्याहुत कलवारल गायतकाले मन्तव्य राखेका थिए ।
कार्यक्रममा प्रहरी नायव उपरिक्षक निर्मल बुढाथोकी, वीरगञ्ज उद्योग वाणिज्य संघका उपाध्यक्ष माधव राजपाल, नेपाली कांग्रेसकी नेतृ रम्भा मिश्र, वीरगंज महानगरपालिकाकी कार्यपालिका सदस्य कनिका कौशिक, जिराभवानी गाउँपालिकाका कार्यपालिका सदस्य सरोज चौरसिया, वडा प्रहरी कार्यालय विर्ताका प्रहरी निरिक्षक विशाल मल्ल, वडा प्रहरी कार्यालय श्रीपुरका प्रहरी निरिक्षक डिल्ली राज सापकोटा, सशस्त्र प्रहरीका प्रहरी निरिक्षक रविन्द्र भट्ट, सामाजिक अभियान्ता प्रकाश थारु, मानवसेवा आश्रम मधेश प्रदेशका संयोजक देवेश मानवसेवालगायतकाको उपस्थिती रहेको थियो ।
भोजनालय सञ्चालनको १ वर्षमा ७७ हजार भन्दा बढी छाक खाना वितरण भएको सानो पाइलाले जनाएको छ । १ वर्षमा भोजनालयको आम्दानी कुल ३८ लाख ९ हजार ८ सय १६ रुपैंया र खर्च ५९ लाख ६ हजार ९ सय ६२ रुपैया रहेको बताइएको छ । जस अनुसार कुल २० लाख ९७ हजार १ सय ४६ रुपैंयाको घाटामा भोजनालय सञ्चालन भएको सानो आयोजक सँस्थाको दाबी छ । ५० रुपैयामा विक्री हुँदै आएको खाना बनाउन प्रति प्लेट नै ७७.५५ रुपैया पर्ने गरेको जनाइएको छ ।
वीरगंजको मुर्ली स्थित ५० रुपैयामा भरपेट भोजन उपलब्ध गराउने उदेश्यले गत २०७८ साउन ३१ गतेबाट सुरु भएको भोजनालयले स्थापनाको एक वर्ष मनाएको हो । एक बर्ष पुरा गरेको अवसरमा भोजनालयले शनिवार वार्षिकोत्सव समारोह तथा ईट फर च्यारिटी कार्यक्रम आयोजना गरेको थियो ।