मुन्नाको पैदल यात्रा : २२ दिनमा वीरगंजदेखि भारतको राजधानी दिल्लीसम्म

वीरगंज (पर्सा), १२ भदौ / वीरगंज महानगरपालिका वडा नं. २ छपकैया निवासी शेष मुन्ना पैदल हिँडेर भारतको संघीय राजधानी दिल्ली पुगेका छन् । मुन्ना २२ दिनको पैदल यात्रा गरेर वीरगंजको घण्टाघर स्थितबाट भारतको संघीय राजधानी दिल्ली पुगेका हुन् । नेपाल भारत दुबै देशबीचको आपसी सम्बन्धलाई अझै प्रगाढ बनाउनका निम्ति मुन्नाले गत साउन २२ गतेदेखि वीरगंजबाट पैदल यात्राको शुरुवात गरेका थिए । उनलाई वीरगंजको घण्टाघर स्थितबाट महानगरपालिकाका उपप्रमुख इम्तियाज आलमले उनलाई फुलको माला, खादा ओढाई अविर टिका लगाई पैदल यात्राको प्रारम्भ गराएका थिए ।
मुन्ना वीरगंज देखि दिल्लीसम्मको १ हजार ६० किलोमिटरको यात्रा पैदल पुरा गरेका हुन् । भारतको राजधानी नयाँ दिल्ली सम्मको पैदल यात्रा थालेका बिरगंजका युवा शेख मुन्नाले २४ औं दिनमा दिल्ली पुग्ने लक्ष्य राखेतापनि उनी २२ औं दिनमा शनिबार दिल्लीको इण्डिया गेटमा पुगेर आफनो यात्रा पूरा गरेका हुन् । नेपाल र भारत दुवै देशको राष्ट्रिय झण्डा सहित शनिबार दिल्लीको इण्डिया गेटमा पुगेका शेख मुन्नालाई नेपाल भारत विश्व विकासपुराका सभापति मधुरेन्द्र जयसवाल, गोर्खा टाइम्स पत्रिकाका पत्रकार इन्द्र कोमल, शेख अताउलका साथै दिल्ली स्थित नेपाली युवाहरुले स्वागत र सम्मान गरेका छन् भने गोर्खा सेनाले मुन्नाले काधमा बोकेको नेपाली झण्डालाई सलामी दिएका छन् ।
शनिबार दिल्लीको इण्डिया गेटमा पुगेर शेख मुन्नाले देशका लागि आफनो किर्तिमानी यात्रा सफलतापुर्वक सम्पन्न गर्न पाएकोेमा सम्पूर्ण नेपाालीलाई धन्यवाद ज्ञापन गरेका छन् । उनले आफनो यो पैदल यात्राले नेपाललाई विश्वमा चिनाउन थप मदत गरेको तथा नेपाल र भारतबीचको रोटीबेटीको सम्बन्धलाई अझै मजबुत बनाउन टेवा पुग्ने वीरगंज महानगरपालिकाका उपप्रमुख इम्तियाज आलमका प्रेस सल्लाहकार महमद सद्दाब मार्फत जानकारी गराएका छन् । नेपाललाई विश्व ब्यापापी रुपमा चिनाउन, पर्यटन प्रवद्र्धन गर्न तथा नेपाल भारतबीचको सम्बन्धलाई अझै बलियो बनाउने उदेश्यले पैदल यात्रा गरेको उनको भनाई छ ।
वीरगंजबाट साउन २२ गते नेपााली पोशाकमा सज्जिएर हिँडेका शेख मुन्नाले थालेको पैदल यात्रा बिहारको रक्सौल, नरकटियागन्ज, रामनगर, बगाहा हुँदै उत्तरप्रदेश पुगेर त्यहाँबाट गाजियावाद, बुलेन्द सहर हँुदै दिल्ली शनिबार दिल्ली पुगेका हुन् । शेष मुन्ना नेपाली काँग्रेसका सक्रिय सदस्य एवं नेपाली काँग्रेस पार्टी वडा न.२ छपकैयाका इकाई सदस्य समेत छन् ।