वीरगंज (पर्सा), २० साउन / भारत रक्सौलको मझौलिया स्थित एक आर्केस्ट्राबाट नेपाली नाबालिकको उद्दार गरिएको छ । चलचित्रमा अभिनय गरएर नाम र दाम दुवै कमाउने प्रलोभन दिएर आर्केस्ट्रामा लगिएकी नाबालिकको उद्दार गरिएको हो । बालिकालाई धेरै खोज्दा पनि नभेटिएपछि हराएको भन्दै उनका अभिभावकले नेपाल प्रहरीलाई खोजिदिन आग्रह गरेका थिए ।
नेपालदेखि भारतको विभिन्न ठाउँमा सोधखोज गर्दा पनि नभेटिएपछि नाबालिककी आमाले मानव बेचबिखन विरोधी एकाई (एएचटियु) क्षेत्रिय सदरमुकाम रक्सौलका प्रहरी निरीक्षक मनोज कुमार शर्मालाई दुखेसो सुनाएकी थिइन् । प्रहरी निरीक्षक शर्माले बालिकालाई बेतिया नजिकैको माझोलिया स्थित आर्केस्टामा राखिएको जानकारी पाएपछि अनुसन्धान शुरु गरेका थिए । राष्ट्रिय बालअधिकार संरक्षण आयोग दिल्ली, मिशन मुक्ति फाउण्डेशन, बाल कल्याण समिति, चाइल्ड लाइन बेतिया, बेतिया महिला थाना प्रहरी, मझौलिया प्रहरी चौकीको सहकार्यमा आर्केस्ट्रामा छापामारी गरी बालिकाको उद्दार गरिएको प्रहरी निरीक्षक शर्माले जनकारी दिए ।
उनका अनुसार सोही आर्केस्ट्राबाट १ जनालाई पक्राउ समेत गरिएको छ । दिल्लीबाट महत्वपूर्ण बैठकका लागि आएका राष्ट्रिय बालअधिकार संरक्षण आयोग दिल्लीका वरिष्ठ सल्लाहकार परेश शाह पनि सहभागी भएका थिए । अख्तियार क्षेत्रीय मुख्यालयका प्रहरी निरीक्षक मनोज कुमार शर्मा र मिशन मुक्ति फाउन्डेसनका निर्देशक वीरेन्द्र कुमार सिंहले आर्केस्ट्रामा हुने मानव बेचबिखनका घटना अन्त्य गर्ने प्रतिबद्धता जनाएका छन् ।
बाल कल्याण समिति बेतियाका अध्यक्ष आदित्य कुमार यादव, मिशन मुक्ति फाउन्डेशनका निर्देशकक बीरेन्द्र सिंह, चाइल्ड लाइन बेट्टियाबाट विलियम अल्फ्रेड र रेखा देवी, एनजीओ अपरच्युनिटी नेपालका सत्यनारायण यादव, बेतिया महिला प्रहरी चौकीकी इन्स्पेक्टर राणा रणविजय सहितका सुरक्षाकर्मीको उपस्थितीमा बालिकाको उद्दार गरिएको हो ।
प्रतिक्रिया दिनुहोस् !