वीरगन्ज (पर्सा), २५ असार / भारतीय प्रहरीले छिमेकी मुलक भारतको रक्सौल स्थितबाट दुईजना युवतीको उद्दार गरि माइती नेपालको जिम्मा लगाएको छ । नेपालबाट भारतको दिल्ली तर्फ जाँदै गरेकी दुई युवतीलाई भारतीय प्रहरीले शुक्रबार राति रक्सौल स्थित रेल्वे स्टेशनबाट उद्दार गरेको हो ।
भारतीय प्रहरीको एन्टी ह्युमन ट्रेफिकिङ् यूनिटका प्रहरी निरीक्षक (इन्स्पेक्टर) मनोज कुमार शर्माको नेतृत्वमा खटिएको प्रहरी टोलीले रक्सौल स्थित रामजी चोकबाट उद्दार गरि नेपाल स्थित माइती नेपाल संस्थाको जिम्मा लगाएको हो । भारतीय प्रहरीको प्रारम्भिक अनुसन्धानका अनुसार युवतीहरुलाई केही प्रलोभन देखाएर ट्रेन चढि भारतको दिल्ली पुग्ने निर्देशन दिइएको थियो ।
त्यसको लागि युवतीहरु तीन दिन अगाडि काठमाडौँ स्थित आफ्नो घरबाट केही पैसा र गहना चोरी गरेर भारतका लागि हिँडेका थिए । युवतीहरु हराएको भन्दै अभिभावकले नेपाल प्रहरीलाई जानकारी समेत गराएका थिए । त्यसैक्रममा अभिभावकले सामाजिक सञ्जाल मार्फत इन्स्पेक्टर मनोज कुमारको सम्पर्क नम्बर पता लगाएर उनलाई पनि बालिकाहरुको खोजी कार्यमा सहयोग गरिदिन आग्रह गरेका थिए ।
इन्स्पेक्टर मनोज कुमारले युवतीका अभिभावकसँग तस्विर सहितको जानकारी माग गरेर उनीहरुको खोजीका लागि एउटा विशेष टोलीनै खटाएका थिए । सोही क्रममा युवतीहरुलाई गएराति १२ बजेको करिबमा ट्रेन स्टेशनबाट उद्दार गरिएको इन्स्पेक्टर मनोज कुमारले बताए । युवतीहरुलाई उद्दार गरेर माइती नेपाललाई आज बिहान जिम्मा लगाइएको छ ।
उनीहरुलाई प्रलोभन देखाएर भारत लैजान लागेका व्यक्तिको खोजी गरि रहेको इन्स्पेक्टर शर्माले जानकारी दिए ।
प्रतिक्रिया दिनुहोस् !