वीरगंजमा वुमन क्रिएशनको साउन मेला सम्पन्न

• मुस्कान श्रेष्ठ
वीरगन्ज (पर्सा), १९ असार / मारवाडी समुदायका महिलाहरुद्वारा संचालित वुमन क्रिएसनले वीरगंजमा ‘साउन धमाका’ मेलाको आयोजना गरेको छ । वीरगंज स्थित जैन भवनमा आयोजित मेलामा मारवाडी समुदायका महिलाहरुले आफैले उत्पादन गरेको विभिन्न प्रकारका खाद्य पदार्थ देखि कपडा तथा गिफ्टका सामानहरुको प्रदर्शन गरिएको थियो । यसैगरी वीरगंज कारगारमा रहेका कैदीबन्दीहरुले उत्पादन गरेको मुडा, रेनकोट, झुल, टोपी, पर्सलाई समेत प्रर्दशनमा राखिएको थियो ।
कार्यक्रममा वीरगंज महानगरपालिकाका नगर प्रमुख राजेशमान सिंहले वीरगंज आर्थिक नगरी समेत भएकाले यस नगरमा रहेका महिला उद्यमीहरुलाई प्रोत्साहीत गर्न महानगरपालिकाले महत्वपूर्ण भूमिका निर्वाह गर्ने प्रतिबद्धता व्यक्त गर्नुभयो । उँहाले महिलाहरुका लागि सिपमुलक तालिमको आयोजना गर्नुका साथै उनहिरुद्वारा उत्पादन गरिएको बस्तुहरुको बजारीकरणमा समेत सहयोग गर्ने बताउनुभयो । नगर प्रमुख सिंहले यस्ता खालका कार्यक्रमले महिला उद्यमीहरुको हौसला बढ्ने भन्दै वुमन क्रिएसनले गरेको कार्यक्रमको प्रसंशा गर्नुभयो । वुमन क्रिएसनकी अध्यक्ष नेहा अग्रवालले महिला सशक्तिकरणको विषय विभिन्न कार्यक्रमहरुमा उठ्ने गरेपनि उक्त महत्वपूर्ण विषय कार्यक्रममै सिमीत हुने गरेको बताउनु भएको छ । उहाँले महिलाहरुमा समेत पुरुष सरह उद्यम व्यापार गर्नसक्ने क्षमता भएको हुनाले त्यस्ता महिलालाई उद्यम क्षेत्रमा ल्याउन सरोकारवाला निकायले सहयोग गर्नुपर्ने बताउनुभयो ।
वुमन क्रिएसनकी सदस्य सुमोना बेर्नजीले अहिले पनि हाम्रो समाजले महिलालाई घर–परिवारको रेखदेख गर्ने रुपमा मात्र लिएको बताउनुभयो । यस्तो मानसिकतालाई चिर्न वुमन क्रिएसनले यसप्रकारको कार्यक्रमको आयोजना गर्दै आएको बताउनुभयो । यो मेला आयोजनाको उदेश्य महिलाहरुको क्षमता अभिवृद्धिका लागि भएको अध्यक्ष अग्रवालले बताउनुभयो । यस्तै वुमन क्रिएसनकी पूर्व अध्यक्ष नुतन सरावगीले पहिलेको तुलनामा अहिले महिलाहरुमा उद्यमशिल बन्नुपर्छ र आफ्नै खुट्टामा उभिनुपर्छ भन्ने चेतना आएको बताउनुभयो । उँहाले खास गरि मारवाडी समाजका महिलाहरुसंग व्यापार –व्यवसाय गर्ने ईच्छुक र योग्य भएता पनि विविध कारणले खुलेर आउन नसकेको बताउनुभयो । सोही कुरालाई मध्य नजर गर्दै यो कार्यक्रमको आयोजना गरिएको बताउनुभयो ।
पूर्व अध्यक्ष सरावगीले समाजमा थुप्रै महिला उद्यमीहरु भए पनि सरोकारवाला निकायको ध्यान पुग्न नसकेको गुनासो गर्नुभयो । २००२ मा ४ जना महिलाबाट संचालन भएको वुमन क्रिएसन संसथामा हाल ४० जना सदस्य रहेका छन् । यस संस्थामा मारवाडी समुदायका मात्र नभई पहाडी, मुस्लीम लगायत अन्य समुदायका महिलाहरुको पनि सहभागिता रहेको छ ।