स्थानीय निर्वाचनमा गठबन्धनकै कारण चाहे अनुसारको परिणाम आउन सकेन : नेका नेताहरु

• मुस्कान श्रेष्ठ
वीरगन्ज (पर्सा), ६ असार / नेपाली कांग्रेसका केन्द्रिय सदस्य रमेश रिजालले आवश्यक्ता भएको ठाउँमा मात्रै गठबन्धन हुनुपर्ने बताएका छन् । नेपाली कांग्रेस पर्सा जिल्ला कार्य समितिद्वारा वीरगंज स्थित नगर सभागृहमा आयोजित कांग्रेसबाट निर्वाचित जनप्रतिनिधिहरुको बधाई तथा सम्मान कार्यक्रमलाई सम्बोधन गर्दै केन्द्रिय सदस्य रिजालले गठबन्धन गर्नु गलत कुरो होइन, तर आवश्यक्ता भएका ठाउँहरुमा मात्रै गर्नुपर्ने बताए ।
उनले पालिका चुनावमा वीरगंज महानगरपालिकामा गठबन्धन गर्नुपर्ने अवस्था नरहेतापनि पार्टीका शिर्ष नेताहरुको निर्देशन अुनरुप गठबन्धन गरेर चुनाव लड्नु पर्ने आफूहरुको रहर नभई बाध्यता रहेको बताए । उनले पार्टीबाट निर्वाचित जनप्रतिनिधिहरुलाई आफ्नो ५ वर्षे कार्यकालमा मालिक बनेर हाईन, जनताको सेवक भएर काम गर्ने सुझाव समेत दिए ।
यसैगरि पार्टीका पूर्व जिल्ला सभापति अजय द्विवेदीले गठबन्धनकै कारण भारतामा कांग्रेस पार्टी ओझेलमा परेको स्मरण गराउँदै नेपालमा पनि गठबन्धन गरेर अघि बढे कांग्रेसको पत्ता साफ हुने बताए । आफू सुरुवात देखि नै गठबन्धनको विपक्षमा रहेको बताउँदै आगामी संघ र प्रदेशको चुनावमा पनि गठबन्धन गरेर अन्य दलका नेताहरुलाई मत दिएर विजय गराउनु पर्ने अवस्था आए कांग्रेस पार्टी अझ बढि कमजोर बन्दै जाने बताए ।
यसरी नै नेपाली कांग्रेसका वीरगंज महानगरपालिकाका नगर सभापति मणिन्द्र लाल नेपालीले पर्सा जिल्लामा नेपाली कांग्रेसलाई जोड्न निकै प्रयास गरेपनि असफल भएको बताए । उनले महानगर कार्य समितिले विभिन्न कार्यक्रमहरुको आयोजना गर्दा नेताहरु कहिलै उपस्थिति नभएको दुःखेसो समेत पोखे । आफूले आयोजना गर्ने कार्यक्रम व्यक्तिगत नभई चार तारे झण्डा र प्रजातन्त्रको मूल्य र मान्यता मान्ने पार्टीको भएको भन्दै कार्यक्रहरुमा सहभागिता जनाईदिन अनुरोध समेत गरे ।
कार्यक्रममा वक्ताहरुले गठबन्धनकै कारण पार्टीले चाहे अनुसारको परिणाम ल्याउन नसकेको बताए । यो गठबन्धन ठगबन्धन भएको हुँदा आगामी संसदीय तथा प्रदेश निर्वाचनमा गठबन्धन नगर्न आग्रह गरेका छन् । गठबन्धनमा रहेका दलहरु कतिको ईमानदार छन् भन्ने कुरा जिल्ला समन्वय समितिको निर्वाचनबाट प्रष्ट भइसकेको उनीहरुको भनाई थियो ।
नेपाली कांग्रेसका पर्सा जिल्ला सभापति जनाद्र्धन सिंह क्षेत्रीको सभापतित्वमा आयोजित कार्यक्रममा मधेश प्रदेशका महामन्त्री बृहस्पति कृष्ण श्रेष्ठ, जिल्ला कार्य समितिका उपसभापति राम नारायण प्रसाद कुर्मी, पर्सा क्षेत्र नम्बर ४ वटा क्षेत्रका सभापतिहरु, वीरगंज महानगरपालिकाका उप–प्रमुख ईम्तियाज आलम लगायतका नेताहरु तथा कांग्रेसबाट निर्वाचित पालिकाका जनप्रतिनिधिहरुको सभागिता रहेको थियो ।