जबरजस्ती गर्भ तुहाउन खोज्दा बलात्कारको घटना सार्वजनिक

• मुस्कान श्रेष्ठ
वीरगंज / बारा जिल्लाको प्रसौनी गाउँपालिका वडा नम्बर ५ की एक १६ वर्षीय किशोरीको गर्भ तुहाउन खोज्दा सामुहिक बलात्कारको घटना सार्बजनिक भएको छ ।
करिब तीन महिना अघि सोही गाउँपालिकाका २५ वर्षीय दिपक साह र श्यामसुन्दर साहले उनलाई सामूहिक बलात्कार गरी गर्भवती बनाएका थिए । घटना बारेमा कसैसंग केही नभन्न ति दुबै युवकले बलात्कृत युवतीलाई धम्की दिएका थिए । तर दुई दिनअघि आफ्नो महिनावारी रोकिएपछि सो बारेमा पिडीत किशोरीले आरोपीतलाई जानकारी गराउदा आरोपितद्वयले घटना सार्बजनिक नहोस भन्ने डरले शानिबार राति नै किशोरीलाई जबरजस्ती डा. ओम प्रकाश महत्तोको क्लिनिकमा लगेर गर्भपर्तन गराएका थिए ।
गर्भपतन गराउने बारेमा आफुलाई कुनै जानकारी नै नदिई आफूलाई अचेत अवस्थामा गर्भपतन गराएको बिहान होशमा आउदा मात्र थाहा पाएको सो घटना बारेमा आफ्ना अभिभावकलाई जानकारी गराएको पीडित युवतीले बयान दिएकी छिन । युवतीका अभिभावकले आरोपितद्वय साह र गर्भपतन गराउने डा. महत्तो विरुद्ध जिल्ला प्रहरी कार्यालय बारामा किटानी जाहेरी दिएका छन् ।
जिल्ला प्रहरी कार्यलय बाराका प्रहरी प्रवक्ता एवम डिएसपी राजेश थापाले किटानी जाहेरी परेका आरोपित साहद्वय र चिकित्सक महत्तो फरार रहेको र उनिहरुको खोजी भइरहेको बताएका छन् ।