जिसस पर्साको निर्वाचनमा जसपा – एमालेको प्यानल विजयी

वीरगन्ज (पर्सा), २७ जेठ / जिल्ला समन्वय समिति (जिसस) पर्साको निर्वाचनमा जनता समाजवादी पार्टी (जसपा) र नेकपा एमालेको प्यानल विजयी भएको छ । शुक्रबार भएको निर्वाचनमा जिसस पर्साको प्रमुखमा जसपाका निरन्जन साह सोनार, उप प्रमुखमा एमालेका पुरन कुर्मीसहित जसपा र एमालेको पुरै प्यानल विजयी भएको हो । जिससको प्रमुखमा सोनार र उप प्रमुखमा कुर्मी १५÷१५ मत ल्याएर विजयी भएको मुख्य निर्वाचन अधिकृत धर्मराज पौडेलले जानकारी दिए । प्रमुखमा विजयी सोनारका प्रतिस्पर्धी नेपाली काँग्रेसका उम्मेदवार सरोज चौरसीयाले १३ मत र उप प्रमुखमा विजयी कुर्मीका प्रतिस्पर्धी काँग्रेस कै सोनी पासवानले १३ मत पाएका थिए ।
जिससको ३ महिला सदस्यमा जसपाकी ब्यान्ति देवी कुर्मी, राजपति देवी र एमालेकी श्रीकान्ति देवी थरुनी विजयी भएका छन् । तिनै जनाले पनि १५÷१५ मत ल्याएर विजयी भएको निर्वाचन अधिकृतको कार्यालयले जनाएको छ । उनीहरुका प्रतिस्पर्धी कांग्रेसका बसन्ती देवी थरुनी, भागवती देवी धिताल र सिता देवी थरुनीले १३÷१३ मत पाएका थिए । एक दलित वा अल्पसंख्यक सदस्यमा एमालेका सुशिला कामी विजयी भएका छन् । कामी पनि १५ मत ल्याएर भएका हुन् । उनका प्रतिस्पर्धी लोकतान्त्रिक समाजवादी पार्टी (लोसपा) का प्रमेम मुखिया विन १३ मत पाएका थिए ।
३ खुल्ला सदस्यमा एमालेका रामप्रसाद यादव, सलिल मियाँ अन्सारी र जसपाका विजय कुमार कुर्मी विजयी भएका छन् । एमालेका यादव र अन्सारीले १५÷१५ मत ल्याएर र कुर्मीले १६ मत ल्याएर विजयी भएका हुन् । उनीहरुका प्रतिस्पर्धी कांग्रेसका मनोज प्रसाद रौनियार १२ मत, कांग्रेस कै संदिप कुमार साह र महबुद रायले १३÷१३ मत पाएका थिए । मुख्य निर्वाचन अधिकृतको कार्यालय रहेको जिसस मै भएको निर्वाचनमा पर्साका १४ वटा पालिकाका प्रमुख र उपप्रमुख गरी २८ जनाले मतदान गरेका थिए । जस मध्ये कांग्रेसका १२, एमालेका १०, जसपाका ५ र लोसपाका १ मतदाता रहेका थिए ।
जिससको निर्वाचनमा जसपा–एमाले र कांग्रेस–लोसपाले तालमेल गरेका थिए ।