भारतमा कोरोनाबाट थप एक हजार ५०० नयाँ सङ्क्रमित

नयाँदिल्ली / भारतमा कोरोनाभाइरसबाट पछिल्लो एक दिनमा झण्डै एक हजार ५०० मानिस सङ्क्रमित भएका छन् । “दैनिक सङ्क्रमितको सङ्ख्या दुई हजारभन्दा कम भएको अहिले तेस्रो दिन हो,” सरकारी एक अधिकारीले पत्रकारसँग भने । भारतमा पछिल्लो समय दैनिक सङ्क्रमितको सङ्ख्या दिन प्रतिदिन घट्दै गइरहेको सङ्घीय स्वास्थ्य मन्त्रालयको तथ्याङ््कले देखाएको छ । यही मार्च १९ का दिन दुई हजार ७५ सङ्क्रमित भएको देखिएकोमा त्यसको भोलीपल्ट मार्च २० मा एक हजार ७६१ जना मात्रै सङ्क्रमित भएका थिए । त्यसैगरी मार्च २१ मा एक हजार ५४९ मा झरेको थियो । भारतमा अहिलेसम्म कोरोना भाइरसबाट कूल सङ्क्रमितको सङ्ख्या चार करोड ३० लाख १० हजार ९७१ पुगेको छ ।
सरकारी अधिकारीका अनुसार पछिल्लो २४ घण्टामा दुई हजार ७४१ कोरोनाभाइरसबाट सङ्क्रमणमुक्त भएका छन् । भारतमा अहिले दैनिक नयाँ सङ्क्रमितको सङ्ख्याभन्दा सङ्क्रमणमुक्त भएकाको सङ्ख्या बढ्दै गइरहेको छ । एउटै अवधिमा नयाँ सङ्क्रमितको सङ्ख्याभन्दा सङ्क्रमणमुक्त भएकाको सङ्ख्या धेरै रहेकाले सक्रिय सङ्क्रमितको सङ्ख्या पनि घट्दै गइरहेको छ । भारतमा कोरोनाभाइरसका कारण अहिलेसम्म पाँच लाख १६ हजार ५१० को मृत्यु भएको छ । तीमध्ये ३१ को पछिल्लो एक दिनमा मृत्यु भएको हो । (रासस÷एएनआई)