वीरगंज (पर्सा), १६ कात्तिक । जनमत पार्टीले मधेश आन्दोलन र ऐतिहासिक जनआन्दोलनबाट प्राप्त उपलब्धि तथा मधेशी जनताको हक–अधिकारमाथि हुने कुनैपनि हस्तक्षेपविरुद्ध सशक्त आन्दोलन गर्ने चेतावनी दिएको छ । पार्टीले छठ पर्वपछि मधेशका मुद्दालाई केन्द्रमा राखेर ठूलो आन्दोलन गर्ने घोषणा गरेको हो ।
वीरगंज महानगरपालिका–१६ स्थित इनर्वा दक्षिण टोलमा आयोजित टोलस्तरीय दीपावली तथा छठ पर्वको शुभकामना आदानप्रदान कार्यक्रममा जनमत पार्टी पर्साका जिल्ला अध्यक्ष ओमप्रकाश सरार्फले यस्तो चेतावनी दिएका हुन् ।
कार्यक्रमलाई सम्बोधन गर्दै अध्यक्ष सरार्फले जनआन्दोलन र मधेश आन्दोलनबाट प्राप्त राजनीतिक उपलब्धि तथा अधिकारको संरक्षणका लागि मधेशी जनता सधैँ सचेत र खबरदारीपूर्ण अवस्थामा रहनुपर्ने बताए । वर्तमान सरकारले मधेश र मधेशी समुदायको हक–अधिकार कटौती गर्ने प्रयास गरिरहेको आरोप लगाउँदै उनले सीमाक्षेत्रमा सर्वसाधारण नागरिकमाथि अपराधीसरह व्यवहार गरिनु आपत्तिजनक भएको टिप्पणी गरे ।
सरकारको यस्तो रवैयाविरुद्ध मधेशी जनतालाई एकजुट हुन आह्वान गर्दै उनले छठ पर्वलगत्तै सशक्त आन्दोलनमा उत्रिने संकेत गरे । शुभकामना आदानप्रदान कार्यक्रममा जनमत पार्टीका केन्द्रीय कार्यकारिणी सदस्य रम्भा मिश्र, जिल्ला उपाध्यक्ष नागेन्द्र गुप्ता, जिल्ला सचिव फुलेना कुशवाहा, सहसचिव सत्जुग साह, जिल्ला सदस्य निकेश महतो, तुलसी राम, अलि अकबर मियाँ, दलित जिल्ला अध्यक्ष रामनरेश राम तथा नेता नसिबलाल सेठलगायतको सहभागिता थियो ।
त्यसैगरी युवा दस्ताका जिल्ला अध्यक्ष मनोज साहसहित पार्टीका नेता तथा कार्यकर्ताहरूको उपस्थिति रहेको कार्यक्रममा सहभागीहरूले दीपावली र छठ पर्वले समाजमा सुख, शान्ति, समृद्धि र आपसी एकता तथा सद्भाव कायम गर्ने विश्वास व्यक्त गर्दै टोलवासी र नगरवासीलाई पर्वको शुभकामना दिएका थिए । कार्यक्रमको सहजीकरण जनमत पार्टी पर्साका जिल्ला प्रवक्ता सहनवाज राकीले गरेका थिए । 
प्रतिक्रिया दिनुहोस् !