वीरगंज (पर्सा), ९ कात्तिक । आफूलाई नेपाल प्रहरी र सशस्त्र प्रहरी बल नेपालको घुमुवा बताउँदै भन्सार छली तथा तस्करीका सामान सजिलै छुटाइदिने प्रलोभन देखाएर रकम असुली गरेको आरोपमा वीरगंजबाट एकजना पक्राउ परेका छन् । जिल्ला प्रहरी कार्यालय पर्साका अनुसार पक्राउ पर्नेमा वीरगंज महानगरपालिका–५ निवासी ५१ वर्षीय अशोक कुमार बर्णवाल रहेका छन् । प्रहरीले उनलाई २०८३ कात्तिक ६ गते वीरगञ्ज महानगरपालिका–५ बाट पक्राउ गरेको हो ।
प्रहरीका अनुसार बर्णवालले आफू सुरक्षाकर्मीको घुमुवा भएको र प्रहरीसँग राम्रो चिनजान रहेको दाबी गर्दै भन्सार छली तथा तस्करीका सामान सहजै छुटाइदिने आश्वासन दिने गरेका थिए । रकम नदिने व्यक्तिका सामानसमेत पक्राउ गराइदिने भन्दै उनले रकम असुली तथा बिचौलियाको काम गर्ने गरेको सूचनाका आधारमा प्रहरीले अनुसन्धान अघि बढाएको जनाएको छ ।
प्रहरीमा जागिर लगाइदिने भन्दै रकम लिएको आरोपमा पनि अनुसन्धान
पक्राउ परेका बर्णवालले नेपाल प्रहरी तथा सशस्त्र प्रहरी बल नेपालमा जागिर लगाइदिने भन्दै विभिन्न व्यक्तिबाट रकम लिएको विषयमा समेत अनुसन्धान भइरहेको जिल्ला प्रहरी कार्यालय पर्साले जनाएको छ । प्रहरीका अनुसार उनीमाथि कानुनी प्रक्रिया अघि बढाइएको छ र घटनासम्बन्धी थप अनुसन्धान जारी छ ।
जिल्ला प्रहरी कार्यालय पर्साका प्रवक्ता तथा सूचना अधिकारी प्रहरी नायब उपरीक्षक चक्रबहादुर मल्लले जारी गरेको प्रेस विज्ञप्तिमा पक्राउ परेका व्यक्तिमाथि अनुसन्धान भइरहेको उल्लेख गरिएको छ । प्रहरीले अनुसन्धानबाट थप तथ्य खुल्ने जनाएको छ । 
प्रतिक्रिया दिनुहोस् !