पोखरिया (पर्सा), २४ असोज । पर्साको पोखरियास्थित नापी कार्यालयका प्रमुख बब्लु पाण्डेमाथि गालीगलौज, अभद्र व्यवहार र धम्की दिएको आरोपमा लेखनदास रामाशिष साह गोढ पक्राउ परेका छन् । घटनामा संलग्न रहेको आरोप लागेका उनका छोरा विनय साह गोढ भने फरार रहेको प्रहरीले जनाएको छ । प्रहरीले रामाशिषलाई नियन्त्रणमा लिएर इलाका प्रहरी कार्यालय पोखरियामा राखेको छ । घटनाबारे थप अनुसन्धान भइरहेको प्रहरीले जनाएको छ ।
प्राप्त विवरणअनुसार केही दिनअघि नापी कार्यालय पुगेका रामाशिषले आफू स्थानीय बासिन्दा तथा पूर्व लेखापढी व्यवसायी सङ्घको अध्यक्ष भएको उल्लेख गर्दै कार्यालय प्रमुख पाण्डेमाथि दबाब सिर्जना गरेका थिए । आफू बसोबास गर्ने वडामै कार्यालय रहेकाले आफूले चाहेजस्तै काम हुनुपर्ने भन्दै उनले नियमविपरीत काम गराउन खोजेको आरोप छ ।
तर, कार्यालय प्रमुख पाण्डेले कानुनी प्रक्रिया र निर्धारित मापदण्डविपरीत काम गर्न नमिल्ने अडान लिएपछि रामाशिषले गालीगलौज गर्दै अभद्र व्यवहार र धम्की दिएको आरोप लगाइएको छ । सरकारी कार्यालयमा कार्यरत कर्मचारीलाई दबाब दिएर नियमविपरीत काम गराउन खोजिएको यो घटनालाई गम्भीर रूपमा हेरिएको छ ।
रामाशिषमाथि सेवाग्राहीको काम गराइदिने आश्वासन दिएर रकम असुल्ने तथा धाकधम्कीको सहारामा नियमविपरीत काम गराउन खोज्ने गरेको आरोपसमेत लागेको छ । यद्यपि, यी आरोपहरूको सत्यतथ्य प्रहरी अनुसन्धानबाट पुष्टि हुन बाँकी छ । घटनामा उनका छोरा विनयको समेत संलग्नता रहेको आरोप छ । उनी फरार रहेकाले प्रहरीले खोजी गरिरहेको जनाएको छ ।
सरकारी कार्यालयमा कानुनी प्रक्रिया पालना गराउनुपर्ने कर्मचारीमाथि नै दबाब, दुर्व्यवहार र धम्की दिइएको आरोप सार्वजनिक भएपछि घटनाको निष्पक्ष अनुसन्धान र दोषीमाथि कानुनी कारबाहीको विषय महत्त्वपूर्ण बनेको छ । प्रहरीले घटनासँग सम्बन्धित आरोपहरूको सत्यतथ्य पत्ता लगाउने जनाएको छ । आरोप अनुसन्धानबाट पुष्टि भएमा सम्बन्धित व्यक्तिमाथि प्रचलित कानुनअनुसार कारबाही हुने व्यवस्था छ ।
प्रतिक्रिया दिनुहोस् !